Kesah Palui : Pamilihan Pambakal

Palui yang sebelumnya gagal jadi pambakal karena buta huruf kini bertekad belajar hingga lulus paket A dan B. Dengan semangat baru, ia kembali mencalonkan diri pada pemilihan berikutnya. Saat diuji, Palui sudah lancar membaca, menulis, dan berhitung, bahkan tahu nama presiden. Namun, saat ditanya berapa jumlah sila dalam Pancasila, ia menjawab enam, bukan lima, hingga dinyatakan gagal lagi. Meski begitu, Palui tetap merasa benar dan tidak menyerah, memperlihatkan semangat pantang mundur meskipun sering salah paham. Cerita ini menyoroti tekad belajar dan sikap lucu Palui dalam menghadapi kekeliruannya dengan polos dan percaya diri.

*****

Rupanya limbah kalah wayah pamilihan pambakal periode tadi maraga kada bisa mambaca, Palui kada handak manyarah.

Inya lalu rajin balajar, napa haja pandidikan diumpatinya. Tamasuk babulik pulang balajar nangkaya kakanakan SD.

Tarnyata bujur haja, Palui ahirnya kawa umpat mancalunakan diri di pamilihan tahun ini.

“Napa lui ikam umpat lagi kah mancalunakan jadi pambakal?” ujar Garbus.

“Aku haram manyarah, aku sudah tamat paket A, umpat paket B artinya aku harat sudah mambaca manulis lawan bahitung,” ujar Palui.

“Ujar habar tesnya batambah palajaran nang lainnya,” ujar Tulamak.

“Aku kada takutan,” Palui manambahi.

Hari Minggu Palui dites.

“Kaya apa Lui, hari ini kada lagi kalu mabawa juki?” ujar patugas.

“Juki sibuk, kada kawa umpat,” ujar Palui manyahuti.

“lain juki anak Tuhirang Lui ai, juki tu iya kaya ikam tahun samalam si Rahmat nang manulungi ikam manjawab,” ujar patugas.

“Ha..ha..buhan pian ini manyupanakan ulun haja, hari ini ulun siap lahir batin kada bajuki-jukian lagi,” ujar Palui.

Lalu patugas mantes Palui mambaca, manulis lawan bahitung. Palui lancar manjawab.

“Bisa ikam tapilih tahun ini, pintar sudah. Kita mulai lagi tes pangatahuan umum, siapa ngaran presiden kita wayahini,” ujar patugas.

“SBY, ulun hapal karna rancak manuntun tipi,” ujar Palui.

“Wah harat banar,” ujar patugas mamuji.

“Nah ini pertanyaan terakhir, pamungkas…barapa Pancasila itu?” ujar patugas.

Palui langsung manjawab: “Ada anam. Satu, Pancasila. Dua, Katuhanan yang maha esa. Tiga, Kemanusiaan yang adil dan….. “Ampun maaf Lui ai, sampian kada lulus, jawaban pian salah,” ujar patugas sarik langsung manyuruh Palui kaluar.

“Sial aku, kada lulus lagi,” ujar Palui wayah tatamu Garbus wan Tulamak.

“Kanapa jadi kada lulus? ngalihkah sualnya?” ujar Tulamak.

“Aku ditakuni barapa pancasila…ku jawab anam, langsung aku kada dilulusakan,” ujar Palui.

“Pancasila itu Lima haja Lui ai,” ujar Tulamak mamadahi.

“Maginnya ai aku diasariki patugas amun manjawab lima.

Ku jawab anam haja disarikinya, apalagi lima,” ujar Palui mangarasi. (rep/fai)

Sumber: Banjarmasin Post Edisi Cetak, tanggal 24 Maret 2020

Palui yang sebelumnya gagal jadi pambakal karena buta huruf kini bertekad belajar hingga lulus paket A dan B. Dengan semangat baru, ia kembali mencalonkan diri pada pemilihan berikutnya. Saat diuji,…