Kesah Palui : Mauyahi Hayam

Palui kebingungan mencari ayam untuk dibuat sup atas permintaan istrinya. Setelah gagal menangkap ayam yang tidur di pohon nangka, ia mendapat berbagai saran dari teman-temannya. Tulamak menyuruhnya menggunakan bawang merah, tapi tidak berhasil. Garbus lalu menyarankan cara aneh: menaburkan garam di kepala ayam agar mudah ditangkap. Palui menuruti saran itu, bahkan memakai sekilo garam, namun tetap gagal dan hanya kelelahan. Akhirnya, ia sadar bahwa dirinya telah dijahili oleh teman-temannya. Dengan kesal, Palui bertekad akan membalas kelakuan mereka di lain waktu.

*****

GARBUS, Tulamak wan Tuhirang kahiranan malihat si Palui datang bapuntalan tapih di pinggang sambil hingak-hingak kauyuhan.

“Uii kakawalan,” ujar Palui. “Jangan kada ingat malam kaina datang ka rumah lah. Aku kana giliran arisan yasinan,” ujar Palui bakakajutan.

“Kanapa Lui pina bahingal, apakah ikam kauyuhan manggani’i bini gasan malam kaina ujar Garbus.

“Aku kauyuhan kada karna manggani’i bini tapi kauyuhan karna aku handak manangkap hayam kada sing dapatan. Ujar biniku baiknya malam ini makanannya sup hayam haja. Tapi aku sudah batuhuk manyasahinya tatap kada dapat jua, rupanya tamasuk hayam liar karna saban malam guringnya kada di kandang tapi di puhun nangka,” ujar Palui.

“Gampang Lui, ujar urang bahari kalu handak manangkap hayam supaya diunjai wan bawang habang bakuyak, lalu imbah mancium inya langsung mauk,” ujar Tulamak manyaranakan.

“Sudah jua kucubai bapuluh-puluh bigi bawang habang tapi kada kawa manangkapnya, bahkan hayamnya makin liar,” sahut Palui.

“Aku ada pandapat ujar,” Garbus handak manggawi Palui. “Kalu nang nyaman manangkap hayam jangan wan bawang tapi wan uyah. Ikam sadiakan uyah saganggam lalu langsung ikam andaki uyah itu di kapalanya, imbah itu langsung haja tangkap batisnya,” ujar Garbus.

“Ooooo….. jadi hayam itu diuyahi sabalum disumbalih,” ujar Palui kada hakun kalah sambil tatawa lalu langsung bulik handak manggawi apa nang disaranakan Garbus.

Kada lawas datang pulang Palui ka warung, muhanya pucat hinaknya makin hingal-hingal pina handak siup kauyuhan.

” Kanapa Lui, sudah dapatlah hayamnya?” ujar Garbus.

“Sudah jua kucuba, uyahnya kada cuma saganggam tapi bakilu- kilu kada kawa jua manjujup apalagi manangkapnya,” sahut Palui.

“Waahhhh…… ikam digawi bubuhannya Lui ai ujar Tulamak, biar sabakul uyahnya ikam hawarakan ka hayam kada cagar kawa manangkapnya.Karna amun ikam kawa ma-andak uyah di kapala hayam ba-arti ikam kawa manangkapnya ujar Tulamak.

“Umai lah….aku digawinya!” ujar Palui bamamai. “Talanjur purun kakawalan, kawan sudah sakit tambah disakiti,” ujarnya. “Kaina ada haja balasannya hari kiamat,” ujar Palui mahalunyur bulik kada saling padahan. (banjarmasinpost.co.id/bpost/tam)

Sumber: Banjarmasin Post Edisi Cetak, tanggal 18 April 2020

Palui kebingungan mencari ayam untuk dibuat sup atas permintaan istrinya. Setelah gagal menangkap ayam yang tidur di pohon nangka, ia mendapat berbagai saran dari teman-temannya. Tulamak menyuruhnya menggunakan bawang merah,…