Kesah Palui : Kakarasan Laki

Palui dan Tulamak berbincang di warung acil Isul sambil membaca berita tentang seorang perempuan yang menjadi korban kekerasan suami. Mereka membahas banyaknya kasus serupa yang tidak dilaporkan ke polisi karena para istri takut atau enggan melapor. Palui mengaku sering melihat bukti kekerasan itu, namun ia juga tidak pernah melaporkannya. Saat ia menyebut “umanya Aluh” yang perutnya bengkak sebagai korban kekerasan, Tulamak menjelaskan bahwa perempuan itu sebenarnya sedang hamil. Percakapan mereka pun berubah menjadi lelucon, menyinggung bahwa “kekerasan” yang dimaksud justru karena kasih sayang, membuat suasana menjadi lucu.

*****

Samingguan ini bila baisukan Palui bilang katuju banar duduk di warung acil Isul, manukar kupi wan mambaca surat kabar.

Manukar kupinya biar sagalas tapi duduknya dua-tiga jam, pukuknya amun kada habis surat kabar tadi kada harapan bagarak tu pang pada kadudukannya.

Napa barita hari ini Lui? ujar Tulamak manakuni Palui.

Nang kaya itu jua, hari ini bilang kadada nang manariknya, ujar Palui.

Mun handak manarik pakai tangan Lui ai, pasti tatarik, ujar Tulamak manimpali.

Tu pang barita napa pina rami, bini baadu lawan polisi masalah kakarasan laki, ujar Tulamak mambalik kawadah barita kariminal.

Oo.. nang ini kah? ujar Palui umpat mambaca barita nang ditunjuk Tulamak.

Kasiannya lah binian nangini, padahal langkar urangnya, maka dipukuli lakinya jua, ujar Tulamak mangasihani.

Itu ngarannya kurban kakarasan laki, atawa wayah ini ngarannya kakarasan rumah tangga, ujar Palui manjalasakan.

Tapi amun handak tahu Mak ai, di dunia ini banyak banar binian jadi kurban kakarasan laki, tapi kada mau mangadu ka pulisi, ujar Palui bakesah.

Kanapa jadi kaya itu Lui, takutan kalu binian tu lah lawan lakinya jadi kada baadu-adu, ujar Tulamak batakun.

Kadanya takutan pang Mak ai, dasar kada hakun mangadu, padahal nyata-nyata buhannya tu kurban kakarasan laki, ujar Palui.

Aku ini banyak malihat buktinya sudah, tapi aku kuler jua maadukan ka pulisi, ujar Palui.

Bujur-bujur ikam bapander Lui ai, ujar Tulamak kada parcaya. Mun ikam malihat buktinya kanapa ikam jua kada mau maadukan ka pulisi, artinya ikam basakungkul lawan laki urang itu, ujar Tulamak sarik.

Aku kada basakungkul Mak ai, jangan ikam manuduh aku sambarangan, ujar Palui mambila diri.

Buktinya banyak sampai parut buhannya tu bangkak gara-gara kakarasan lalakian, jar Palui.

Amun ikam kada parcaya, cuba ikam lihati umanya Aluh itu, bangkak lah parutnya, ujar Palui.

Umanya Aluh tu bujurai bangkak parut sidin, tapi batianan, kadanya suah dipukuli lakinya, ujar Tulamak mamadahi.

Nah, itu tamasuk kurban kakarasan laki jua. Cuba mun ampun nang laki kada karas, kada bakalan bangkak kaya itu parut sidin, ujar Palui mangalakak tatawa kawa mangalahakan Tulamak.

Wajar ja amun kaya itu biniannya kada mau malapur pulisi, karna lain karasnya, karas manyamani, ujar Tulamak kakalahan. (edisi cetak)

Sumber: Banjarmasin Post Edisi Cetak, tanggal 21 April 2020

Palui dan Tulamak berbincang di warung acil Isul sambil membaca berita tentang seorang perempuan yang menjadi korban kekerasan suami. Mereka membahas banyaknya kasus serupa yang tidak dilaporkan ke polisi karena…