Kesah Palui : Mambalah Batung
- 40 kali
Palui, Garbus, Tulamak, dan teman-temannya datang ke Banjar untuk membantu persiapan pernikahan Haji Adul. Mereka bekerja sama membelah batang bambu besar untuk membuat lantai dapur, tetapi meski sudah berusaha keras, bambu itu tidak kunjung terbelah. Seorang tua bernama Kai Tuganal datang dan menunjukkan cara yang benar dengan kerja sama dan doa. Akhirnya bambu bisa dibelah dengan mudah. Dari kisah itu, Palui menarik makna bahwa di zaman sekarang orang yang ingin sukses sering “menjunjung ke atas” dengan menjilat penguasa, namun “menjajak ke bawah” dengan menindas rakyat kecil. Pesannya tentang kerja sama dan kejujuran dalam hidup tersirat kuat.
*****
MAMARINA Garbus nang di Anjir, yaitu Wa Haji Adul handak bapangantinan. Sidin basaruan sampai ke Banjar, salajur manyaruani Palui, Garbus, Tuhirang dan Tulamak, sakalian wan bininya masing-masing. Karena sudah tarakat di banua Banjar, kulawarga datangan talu atau ampat hari badahulu. Buhannya ini bagutung ruyung baulah sarubung, tungku pangawah, atawa palataran tajunggat dan jabuk.
Hari itu buhannya handak mambalah haur batung, gasan mangganti lantai padapuran. Garbus wan Tuhirang handak mambalah sebatang batung ganal. Sudah mamakai kapak wan parang. Dibulak balik tumatan hujung ke hujung, sudah dicatuk, dicungkil wan kayu, tapi sebatung tatap kada kawa dibalah Tuhirang, Tulamak wan Garbus sudah tapaluh, tapi sibatung tatap kada kada bisa dibalah. Buhannya parak sudah putus asa.
Lalu datang urang tuha, Kai Tuganah ngaran sidin. Kai ini mamadahi caranya mambalah batung. Ujar sidin, mula-mula dibalah tumatan ujungnya lawan parang. Lalu bagamat, kita baimbai ma-angkat balahan itu. Nang di atas kita junjung, nang di bawah kita jajak.
Nah, ujar Kai Tuganal, aku mambantu. “Bismillah….satu…dua…tiga…ayu batumin….wahai panglima Pambalah Batung nang di Hamuntai….tulungi kami….ayoooo!
Maka, kraak…..kraak, batung itu menjadi belah dua selanjutnya dibalah diricik lagi gasan maulah lantai padapuran. Dalam timpu saharian itu, karena digawi sanggam sabarataan, tuntunglah samamuanya. Isuk harinya tinggal ma-arak pengantin haja lagi.
Malam itu Kai Tuganal bakisah pangalaman sidin mambalah batung. Buhannya Palui asyik banar mandangar kisah Kai.
“Umai kai, hibat banar kisah pian Pas banar gawian urang zaman sekarang, kai-ai,” ujar Palui mamuji.
“Pasnya nang mana?” takun Kai.
“Jaman ini, Kai-ai urang bausaha handak suksis itu, harus manjunjung ka atas, manjajak ka bawah” ujar Palui.
“Kaya apa itu?” takun Kai hiran.
“Artinya, mamuji, manyanjung, manjilat para penguasa di atas, tapi inya jua manjajak menyakiti masyarakat jimbil di bawahnya, sahingga nang bungul tambah bungul, nang miskin tambah malarat,” ujar Palui.
“Banar, Lui-ai.” “Batul, Lui-ai. “Pas, Lui-ai” ujar buhannya nang lain, sahingga Palui kahimungan,
Imbah kisah Kai Tuganal itu, lalu rami pulang kisah-kisah lainnya. Tumatan di dalam, kaluar sasurungan tih kupi lawan wadai-wadaian gaguduh, amparan tatak dan lain-lain. Itulah kasampatan silaturrahmi kulawarga urang Banjar, wayah bapangantinan. (bpost/aan)
Sumber: Banjarmasin Post Edisi Cetak, tanggal 24 April 2020
Palui, Garbus, Tulamak, dan teman-temannya datang ke Banjar untuk membantu persiapan pernikahan Haji Adul. Mereka bekerja sama membelah batang bambu besar untuk membuat lantai dapur, tetapi meski sudah berusaha keras,…
