Kesah Palui : Asa Lapang Dada

Kesah Palui : Asa Lapang Dada

Pada malam takbiran, Palui dan kawan-kawannya menjadi amil zakat di masjid hingga larut malam. Dalam perjalanan pulang, Garbus menyindir Tulamak yang jarang puasa tapi ikut bertakbiran. Tulamak menyesal dan berjanji tahun depan ingin lebih rajin beribadah. Palui lalu menceritakan dengan bangga bahwa dirinya merasa tenang setelah Ramadan karena sudah salat, puasa, zakat, dan saling memaafkan, bahkan dengan orang yang pernah memberinya hutang. Namun, Tulamak menjelaskan bahwa memaafkan bukan berarti hutang lunas. Palui tetap bersikeras, menganggap semua sudah rela dunia akhirat, membuat Garbus hanya bisa geleng kepala melihat kepolosannya.

*****

Wayah malam hari raya tadi Palui wan kakawalannya umpat manjadi amil zakat di masigit. Sakalian mahadangi urang maantar fitrah bubuhannya salajur jua batakbiran. Ada pang sampai pukul dua balas hanyar tuntung bulikan ka rumah.

“Ujar tuan guru bahwa urang nang kada ganap puasanya alias balang kambingan atawa nang puasa ramadhan sanin kamis mustinya kada usah umpat batakbiran,” ujar Garbus manyindir Tulamak wayah bulik matam masigit.

“Kalu kada umpat batakbiran maka makin katahuan banar kada puasa, jadi sakakalinya kada pamuasa, jarang tarawih lalu kada umpatan marayaakan hari fitrah, maka bisa dipadahakan urang islam KTP haja,” ujar Tulamak pina manyasal.

“Nah Mak, sasal dahulu pandapatan sasal kamudian kadada gunanya,” ujar Garbus.

“Ayu ja aku bajanji, tahun kaina aku bahimat baibadat ujar mambayar karugianku tahun ini,” ujar Tulamak.

“Mudahan ikam panjang umur,” ujar Palui manyahutakan janji Tulamak dihadapan Garbus.

“Cuba cuntuh si Palui urang nang taat baibadat kada katinggalan waktu ujar Garbus maambung Palui.

“Palui ini tamasuk urang kumplit,” ujar Tulamak.

“Alhamdulillah imbah puasa ini aku bujur-bujur asa lapang dada, kada lagi nang dipikirakan. Puasa kawa sabulanan, tarawih kada katinggalan, zakat fitrah dipunahi, lalu sudah basalaman, sudah barelaan, sudah bamamafan lahir bathin wan kakawalan, wan warung pakacil Isul wan kuperasi. Samunyaan sudah ikhlas kadada lagi sangkut paut hutang-hutang,” ujar Palui lihum.

“Kanapa Lui, kadada lagi sangkut paut hutang-piutang?” ujar Garbus batakun.

“Bujur Bus ai, aku sudah minta maaf barelaan wan pakacil Isul nang bawarung, wan julak Ambrun nang mangariditakan sapida, wan gulu Janang nang mahutangi baju salawar dan bubuhan sidin-sidin samunyaan sudah ikhlas mamaafakan aku dan rela bila ada nang bakalangan di hati,” ujar Palui.

“Ikam salah tafsir Lui ai, maaf bamaafan itu ihlas haja bila ada salah hilaf tapi sual hutang kada kawa dimaafakan karna itu urusan dunia,” ujar Tulamak.

“Bujur bubuhan sidin kutakuni dan hakun mamaafaakan aku lahir bathin, dunia akhirat,” ujar Palui mangarasi.

“Ayu ja tapintar ikam bapander Lui ai, mudahan bubuhan sidin bujur-bujur ikhlas,” ujar Garbus kada kawa malawani Palui nang pambabal.

“Mudahan ai sidin-sidin itu kada purun lagi managih karna samunyaan sudah barelaan lahir batin, dunia akhirat tamasuk hutang-hutangku nang jumlahnya ratusan ribu,” ujar Palui pina kahimungan banar. (*)

Sumber: Banjarmasin Post Edisi Cetak, tanggal 26 Mei 2020

Pada malam takbiran, Palui dan kawan-kawannya menjadi amil zakat di masjid hingga larut malam. Dalam perjalanan pulang, Garbus menyindir Tulamak yang jarang puasa tapi ikut bertakbiran. Tulamak menyesal dan berjanji…

Tinggalkan Balasan

Alamat email Anda tidak akan dipublikasikan. Ruas yang wajib ditandai *