Kesah Palui : Dibasmi Dibasmi

Palui tampak murung karena mintuahnya mudah marah tanpa sebab. Garbus dan Tulamak mencoba menghibur dengan mengajaknya ke pasar besar untuk mencari obat penenang. Di pasar, mereka mendengar pedagang yang berteriak menjual obat mujarab untuk sakit perut dan orang tua yang pemarah. Palui tertarik membeli karena berharap mintuahnya bisa tenang, namun setelah diperhatikan, obat yang dijual ternyata racun tikus. Ia tertawa lega karena hampir saja membahayakan nyawa mintuahnya. Garbus dan Tulamak pun ikut tertawa, menyadari betapa lucunya niat baik yang nyaris berujung celaka karena salah paham.

*****

SABAISUKAN Palui sudah pina talihat rancak malamun. Biasanya bila takumpul kakawalannya inya nang palantihnya bapander, ini pina banyak bahinip haja.

“Napa nang dipikirakan wal, pina taungut tarus? ujar Garbus manakuni.

“Hiih, kada biasa aku manamuni ikam kaya ini Lui ai,” ujar Tulamak jua.

“Mintuhaku wayahini panyarikan banar, dimapa alih cara mahadapinya, sadidikit balalu sarik ha sidin” ujar Palui bakisah.

“Kalu di rumahku, biniku nang pina pusang. Napang amun bahalulung kasakitan parut kada sing ampihan.

Kalu masalah di rumah, baiknya kada usah dipikirakan. Kaya apa kalu bajajalanan ka pasar ganal, balalihat urang bajual ubat. Salain kawa mahilangakan satris lawan kalu ada nang bajual ubat gasan bahiraan bini Garbus,” ujar Tulamak mambari usul. Lalu ai bubuhannya batiga tulakan ka pasar ganal.

baluman sampai kadalam pasar , balalu ham takajut nang batalu itu mandangar suara urang badagang kukuciak, tadiam katiganya mandangar suara urang nang bajualan itu.

“Di………..basmi dibasmi dibasmi……… Di………. basmi dibasmi dibasmi………. Sakit parut bahira kapur,.. makanlah ubat ini, 1 jam 15 menit ampih bahira kapur” ujar padagang tadi.

“Di…. basmi dibasmi dibasmi….. di…. basmi dibasmi dibasmi….. Urang tuha panyarikan,.. dibari ubat ini ampih panyarikan…”

Cagat talinga Palui wan Garbus mandangarakan urang nang bajualan tadi. “Nangapa garang ubat nang dijualnya itu, asa handak manukar ha aku” ujar Palui.

“Aku gin asa kapingin jua nah, coba pang diitihi bujur-bujur nangapa garang ubat nang dijualnya itu?” ujar Garbus. Lalu ai bubuhannya batiga umpat bakajal di karumbungan urang nang rami malihat.

“Di………..basmi dibasmi dibasmi……….”

“Di………. basmi dibasmi dibasmi………. Sakit parut bahira kapur makanlah ubat ini… 1 jam 15 menit, ampih bahira kapur”

“Di…. basmi dibasmi dibasmi….. dibasmi dibasmi dibasmi….. Urang tuha panyarikan, dibari Ubat ini, ampih panyarikan,…”

“Ha ha ha ha…” mangalakak Palui tatawa imbah malihat ubat nang dijual.

“Napa maka ikam tatawa Lui” ujar Garbus wan Tulamak jua taheran-heran malihat tingkah Palui.

Sambil manggamit bubuhan Garbus wan Tulamak hanyar Palui bakisah. “Bungul banar sidin nang bajualan itu, parak banar tatipu aku sudah. Untung kada jadi manukar, maka handak banar hati sudah. Jaka tida, han taracuni mintuha, untung kada jadi manukar. Ha ha ha ha…” ujar Palui.

“Nangapa garang Lui nang dijual sidin tutih,” ujar Garbus wan Tulamak

sambil tapapalingau badudua malihat Palui.

“Tahulah bubuhan ikam badua, nangapa nang dijual sidin tu?”

“Napa tadih Lui?”

“Sidin itu tadi bajual racun tikus. Bujur haja panyarikan wan sakit parutnya hilang, napa amun urangnya jiun karacunan,” ujar Palui

“Umai lah, parak banar jua aku taracuni bini nang kasasakitan parut dirumah, ha ha ha….” ujar Garbus umpat jua mangalakak sambil batapak ka dahi. (bpost)

Sumber: Banjarmasin Post Edisi Cetak, tanggal 27 Mei 2020

Palui tampak murung karena mintuahnya mudah marah tanpa sebab. Garbus dan Tulamak mencoba menghibur dengan mengajaknya ke pasar besar untuk mencari obat penenang. Di pasar, mereka mendengar pedagang yang berteriak…