Kesah Palui : Syarat Babini

Garbus merasa risih mendengar pertengkaran Tulamak dan istrinya yang terus-menerus ribut. Ia menasihati agar Tulamak hidup rukun, namun Tulamak mengeluh bahwa istrinya sering pulang ke rumah orang tuanya karena salah paham soal keuangan. Palui yang ikut berbicara mengungkapkan kabar bahwa Tulamak ingin menikah lagi dengan perempuan muda. Garbus dan Palui lalu menasihati agar ia tidak melakukannya, sebab beristri dua tidak mudah dan penuh tanggung jawab. Palui menjelaskan empat syarat bagi laki-laki yang ingin beristri dua: sehat rohani, mampu memberi nafkah, penuh kasih sayang, dan terakhir mampu secara lahir batin — yang tampaknya tidak dimiliki Tulamak.

*****

GARBUS nang rumahnya basubalahan wan rumah si Tulamak muyak banar mandangar bilang saban hari Tulamak dua laki bini haur bahual bakalahi.

Maka bilang badadua pina mahahing, kadada nang maunya mangalah alias balamah. Kada siang kada malam pokoknya nangkaya kucing wan anjing bila batamuan.

“Balaki babini itu harus rukun-rukun Mak ai,” ujar Garbus manasihati Tulamak.

“Aku paham haja Bus ai tapi karna aku wan biniku rancak tahual dan kada bakacucukan makanya biniku rancak bulik ka rumah abah umanya,” ujar Tulamak.

“Bila inya bulik ka rumah urang tuhanya lakas-lakas diambili supaya jangan rami jadi paderan urang,” ujar Garbus.

“Sudah jua kugawi anjuran ikam itu, bulik satumat lalu tajun pulang,” ujar Tulamak.

“Napa sualnya Mak?” ujar Garbus.

“Sualnya adalah kacurigaan haja, mamadahakan aku mahambur-hambur duit gasan bararamian. Padahal dasar duitnya nang kadada karna bajualan wayahini ngalih banar, banyak saingan dan haraga larang-larang,” ujar Tulamak.

“Kalu itu alasannya, kaina kubujuki bini ikam supaya inya bisa mengerti alasan ikam itu,” ujar Garbus.

“Kada usah baulah macam-macam alasan Mak ai, aku tahu samunyaan alasan nang sabujurnya,” ujar Palui nang hanyar cangul umpat manyahut.

“Napa alasan nang sabujurnya Lui maka Tulamak ini kada bakacucukan laki bini?” ujar Garbus mambisiki Palui handak tahu.

“Kudangar dan ada saksi nang kawa diparcaya bahwa Tulamak itu handak kawin lagi, handak babini anum,” ujar Palui.

“Kalu kaya itu baiknya ikam Lui ai nang manasihati Tulamak supaya inya jangan kawin lagi. Kasihan bininya,” ujar Garbus.

“Ayu ja, kaina aku manasihatinya. Mudahan Tulamak maasi imbah dinasihati,” ujar Palui langsung mangiyau Tulamak.

“Kita sudah bakawan lawas, rasa sudah badangsanak Mak ai, makanya janganlah baungkara handak babini anum. Kada nyaman babini dua itu, banyak banar gudaannya, harus adil dalam mambari nafkah, baik nafkah makan nginum dan pakaian apalagi nafkah batin. Sangguplah ikam Mak?” ujar Palui lamah-lambut manasihati.

“Aku handak mancuba-cuba haja, handak maubah rasa Lui ai,” sahut Tulamak.

“Kawin dan babini itu jangan diulah cucubaan, syaratnya ngalih dan harus dipenuhi. Kalu ikam kada sanggup,” ujar Palui.

“Napa syaratnya Lui?” ujar Garbus.

“Syaratnya adalah ‘4 ras’ dan harus dipenuhi,” ujar Palui.

“Napa ampat ras itu Lui,” ujar Tulamak.

“Urang babini itu, apalagi handak babini dua, harus mamanuhi ampat syarat, pertama wa-ras alias sehat rohaninya, kadua sanggup manyadiakan ba-ras alias mambiayai, katiga harus ma-ras alias bakasih sayang, lalu nang ka-ampat…” ujar Palui bamandak manyambat.

“Nang kaampat napa Lui?” ujar Garbus handak tahu.

“Nang kaampat itu kukira nang kada kawa dipenuhi Tulamak, karna inya mandarita panyakit gula makanya inya kada kawa ka….” ujar Palui kada hakun manyambat. (tam)

Sumber: Banjarmasin Post Edisi Cetak, tanggal 28 Mei 2020

Garbus merasa risih mendengar pertengkaran Tulamak dan istrinya yang terus-menerus ribut. Ia menasihati agar Tulamak hidup rukun, namun Tulamak mengeluh bahwa istrinya sering pulang ke rumah orang tuanya karena salah…