Kesah Palui : Sandal Amas

Kesah Palui : Sandal Amas

Palui dan kawan-kawannya heboh mendengar kabar ada orang kampung bernama Acil Amas yang dikira memiliki sandal emas. Karena penasaran, mereka datang membuktikan sendiri. Setelah tiba, Acil Amas menunjukkan sandalnya sambil tertawa, menjelaskan bahwa sandalnya bukan terbuat dari emas, melainkan karena namanya “Amas”, orang-orang salah paham dan menyebutnya “sandal Amas”. Bahkan sandalnya pernah tertinggal di masjid hingga banyak orang mencarinya. Palui dan teman-temannya malu karena salah sangka, sementara Acil Amas tetap santai dan humoris. Akhirnya mereka pulang sambil tertawa, belajar untuk tidak mudah percaya pada kabar yang belum pasti.

*****

KALAU pamain bal di piala dunia biasanya ada nang mandapatakan sapatu amas atau bal amas, karana prestasi sabagai pancetak gol ka gawang lawan nang paling banyak, atau jar urang topskorer, nitu wajar tarjadi tiap kagiatan piala dunia.

Tapi, nang sabuting ni urang di kampung Palui ada baisian sandal amas luar biasa hebohnya. ”Macam-macam Lui lah habar di akhir zaman ni, supaya tampil beda dari kabanyakan manusia lainnya iya kada?” sambat Garbus.

“Kaya nitu pang manusianya, bila biasa-biasa haja kada bakalan tarkenal jadi manusia, tapi kalau ada sesuatu nang luar biasa, maka nitu capat dikenal urang lain,” sahut Palui.

“Cuntuhnya iya sidin baisi sandal amas itukah Lui?” Tulamak manyahut.

“Iya cuba ha ikam bayangkan, kaya apa kasugihan urangnya, padahal sidin nitu urang kampung jua, tapi baisian sandal amas, luar biasa, apalagi peralatan lainnya kudangar banyak nang tarbuat matan amas jua, cuntuh nang lain saparti surui amas, rinjing amas, duit amas wan banyak lagi nang lainnya,” Palui sarius mambawa habar.

“Kita nang kada tahu ni, parcaya atau kada parcaya tarsarah sorang ai lagi, iya kalu Lui?” sela Garbus.

“Ayuha nah kalu damintu aku bawa ha ka rumah sidin supaya parcaya, jadi kada tamakan pander doang, jar urang Jakarta nitu?” Palui mangajak buhannya ka rumah nang baisi sandal amas.

“Apa habarnya Lui, handak kamanaan jadi singgah ka rumahku?” takun Acil Amas ka Palui.

“Ulun Cil ai, handak mambuktiakan adakah pian baisi sandal amas?” sahut Palui.

“Nih Lui wan kawan Palui, sandal nang kupakai adalah sandal amas, apa bujur atau karamputkah?” ujar sidin ka buhannya.

Maitihi Garbus wan Tulamak. ”Eh karamput haja ni, sandal amas!” sambat Tulamak mampahawai.

“Bujur karamput nah lain amas 24 karat pang, tapi sandal amas ngaranku nih Amas, jadi urang manyambatnya sandal Amas, sandalku ni suah tatinggal di teras masjid, sakalinya diumumakan urang bahwa sandal Amas tatinggal, banyak nang manyasah, eh sakalinya sandalku nang kukira hilang ada nang maandak kembali di teras masjid, padahal aku bulik waktu nitu kada besandal, iya haja sudah!” ujar sidin manjalasakan sambil tatawa kalihatan gigi sidin kaya amas jua kuning.

“Bah iya haja ikam Lui ai, mangalahakan kami badua,” sahut Garbus manumpalak.

“Rami kalu sidin bakisah,” tukas Palui wan Acil Amas takurinyum, buhannya makalahan am asa dibunguli.

“Ingatakan ha Lui ai, kena ikam sakali-sakali kami kalahakan jua, tahu tu rasa!” sindir Garbus sambil lakas bulik wan Tulamak basapida mutur buhannya. Tadiam Palui karana mandapat ancaman Garbus itu. (aan maulana/penulis matan kuta dudul,HSS)

Sumber: Banjarmasin Post Edisi Cetak, tanggal 10 Oktober 2018

Palui dan kawan-kawannya heboh mendengar kabar ada orang kampung bernama Acil Amas yang dikira memiliki sandal emas. Karena penasaran, mereka datang membuktikan sendiri. Setelah tiba, Acil Amas menunjukkan sandalnya sambil…

Tinggalkan Balasan

Alamat email Anda tidak akan dipublikasikan. Ruas yang wajib ditandai *