Kesah Palui : Intanya-Ai

Garbus kini jarang berkumpul di gardu karena sibuk berjualan buah dengan mobil pikap. Ia menjual berbagai buah sesuai musim, seperti rambutan, durian, mangga, dan lainnya. Sistem kerjanya bagi hasil dengan pemilik mobil dan modal, sehingga tetap menguntungkan meski sederhana. Ia paham strategi berdagang, seperti menjual murah buah yang mulai rusak agar tidak rugi besar dan menerapkan “subsidi silang” antara keuntungan dan kerugian. Bagi Garbus, berdagang adalah seni bertahan hidup dengan kejujuran, kesabaran, dan kerja keras. Ia juga belajar memahami pembeli dengan hati, seperti saat membantu ibu-ibu miskin yang ingin buah dengan penuh harap.

*****

GARBUS wayah hini agak jarang bakumpulan di gardu salawas inya ampih maujik. Sualnya, wayahni inya dijulungi urang mutur pikap gasan bajualan buah-buahan sasuai awan musimnya.

Amun wayah musim rambutan inya batukar rambutan ka kabunnya, imbah hitu hanyar dibawanya ka kuta gasan dijualnya sacara inciran di pinggir-pinggir jalan kuta Banjarmasin. Jadi, amun pas musim durian inya bajual durian, musin tiwadak bajual tiwadak. Bagitu satarusnya, musim mangga, musim langsat, musim sumangka, musim kasturi, dll.

Gawiannya nitu bakarjasama awan nang ampun pikap, sakalian jua awan mudal gasan batukar buah. Hasil kauntungan barasihnya-imbah diputung ungkus-ungkus dibagi awan boss nang ampun mutur ditambah mudal (dapat 60 %), sisanya 40 % gasan Garbus (sualnya Garbus bapuku awak haja).

Bajualan dangan cara bamutur pikap nitu kalihatannya labih paraktis dan manguntungkan dibanding bajualan sacara manatap di kius. Nang nyata kada parlu manyiwa atawa baulah kius. Kada usah baulah rak, kada babayar ritribusi tampat. Mana pulang kawa labih proaktif mandatangi pambali, misalnya kalu wayah ada karasmin. Amun di tampat itu ditagur ulih Satpul PP bajualan, sagra bapindah mancari tampat lain.

“Amun pas disuruh bapindah ulih Satpul PP, sakalinya muturnya muguk, kaya apa-am ikam, Bus ?” takun Tulamak.

“Yahh… Amun kada kawa lagi, tapaksa-ai minta tulung mutur Satpul PP manarikakan muturku,” ujar Garbus santai. “Tapi kada suah pang kajadian nangkaya itu, sabab muturku nitu salalu kujaga supaya tatap tukcir”, jar Garbus pulang.

“Bajualan buah tu, Bus.., mun kada bapayuan risikunya bisa buruk kalu?” takun Tuhirang.

“Dasar bujur, Tuhirang-ai. Tapi aku sudah paham haja, mun kikira taka-isuk buah pacang burukan, maka hari itu kujual ubral, jual puku kadapapa,” ujar Garbus.

“Kada rugi-lah ikam, Bus ? Kan ada ungkus angkut sagala macam ?!!” bahas Tulamak.

“Parinsif dagangnya, biar ha rugi sadikit, daripada rugi banyak. Awan jua.. Kan sudah ‘disubsidi silang’ wan kauntungan hasil jualan buah nang masih sigar-sigar,” ujar Garbus maungkai rahasia parusahaan.

“Kuakui Garbus wayah hini utak dagangnya bujur-bujur jalan, bahkan inya sudah sampai ka ilmu ‘subsidi silang’ sagala macam,” ujar Palui maambung Garbus.

“Nitu ilmu abahku badagang bahari, Lui-ai…, Cuma astilahnya banarai nang diparbaharui,” ujar Garbus lihum.

“Tarus.. salawas ikam bajualan buah ini, Bus.. Suahlah ikam mangalami hal-hal nang manyadihkan?” takun Tulamak.

“Mun nang manyadihkan tu kadada pang. Kalu sual rugi, atawa mantuk puku (bahujung lapah haja), nitu hal nang biasa kalu urang badagang. Cuma nang maulah aku asa takurihing ada pang, buhannya-ai,” ujar Garbus maungkai kisah.

Waktu itu pas musim mangga, jadi aku umpat jua bajual mangga. Pas muturku bamandak, langsung rami urang bakarumbung mamilih mangga sasuai salira masing-masing. Saking banyaknya urang, bilang basarinding mangulilingi bak mutur.Di antara urang nang banyak itu ada saurang ibu-ibu umpat jua bakajal mamilih mangga sing lawasan. Saking lawasnya, sampai urang-urang nang banyak tadi tuntungan nukar mangga dan bulikan, tatinggal si ibu nitu surangan.
“Napa Pian, Bu ..? Nang mana jua pilihan Pian ?”, takunku. “Ulun lihat pian mamilih matan panambayan sampai urang habis bulikan,” jarku pulang.

“Ini nah.. Ada ‘talu bigi’, jar Ibu nitu. “Nang sabigi ni lirut, nang ini tikut, wan nang sabiginya ni buruk sapanggal!”ujar ibu nitu sambil manating mangga talu bigi.

“Imbah maksud Pian napa, Bu..?”, takunku kada paham.

“Mun ikam ridha…Aku intanya-ai,” ujar Ibu nitu dangan suara harap camas. (Ifan, sahibul hikayat matan rawasari)

Sumber: Banjarmasin Post Edisi Cetak, tanggal 8 Oktober 2018

Garbus kini jarang berkumpul di gardu karena sibuk berjualan buah dengan mobil pikap. Ia menjual berbagai buah sesuai musim, seperti rambutan, durian, mangga, dan lainnya. Sistem kerjanya bagi hasil dengan…