Kesah Palui : Pisang Lubuk

Palui menanggung biaya sekolah kemenakannya, Hamdanah, anak dari adiknya yang menjadi janda sejak suaminya meninggal. Dengan ketekunan dan dukungan Palui, Hamdanah tumbuh menjadi anak rajin dan cerdas hingga berhasil masuk Fakultas Kedokteran melalui jalur undangan. Meski sempat khawatir soal biaya, Palui menenangkan dan terus menyemangatinya. Berkat kerja keras, Hamdanah lulus sebagai dokter dan bekerja di puskesmas, bahkan menikah dengan rekan sejawatnya. Palui sangat bangga, apalagi saat memiliki cucu dari kemenakannya itu. Suatu hari, terjadi kelucuan ketika ibunda Hamdanah memberi cucunya pisang, membuat semua tertawa karena nostalgia masa kecil Hamdanah yang ternyata dulu pun tumbuh sehat berkat “pisang lubuk”.

*****

PALUI baisian anak-kamanakan diujud bibinian, ngarannya Hamdanah. Umanya Hamdanah adalah dangsanak ading Palui. Abahnya Hamdanah sudah maninggal dunia waktu inya masih baumur kurang-labih 6 tahun. Sadangkan nang uma (ading Palui) kada hakun balaki lagi, padahal banyak haja urang nang handak maambil bini.

Mamanya Hamdanah mahidupi diri awan anak tunggalnya nitu dangan usaha bajajahit. Alhamdulillah cukup haja rajakinya gasan hidup sacara sadarhana. Untung haja jua inya ada baisi kabisaan di tangan, jadi sual ikunumi kaluwarga kada talalu masalah banar imbah nang laki tu maninggal.

Samantara biaya sakulahnya Hamdanah sapanuhnya ditanggung ulih Palui, nang kahidupannya wayah hini nang sudah samakin mapan.

“Nang panting, nak-ai,” ujar Palui mamadahi kamanakannya nitu, “ikam balajar bujur-bujur nang rajin. Pukuknya asal ikam ada kamauan, paman siap haja maungkusi ikam sakulah sampai satinggi-tingginya.”

Syukurnya si Hamdanah ini kakanaknya rajin wan pintar. Tumatan sakulah SD sampai tamat SMA, salalu tamasuk ringking 5 basar. Kada jarang inya nang jadi juara satu atawa dua.

Imbah tamat SMA, syukur alhamdulillah pulang, ditarima masuk kuliah di Fakultas Kadukturan malalui jalur undangan atawa Pi-Im-Di-Ka (PMDK).

Asalnya inya asa ragu maingat biaya sakulah di kadukturan nitu ganal, awan haraga buku-bukunya larang, samantara umanya sakadar tukang jahit di kampung.

“Ikam kada usah mamikirakan sual itu, nak-ai”, jar Palui. “Tugas ikam balajar haja nang sungguh-sungguh. Doakan haja mudah-mudahan Paman banyak rajaki”, jar Palui pulang.

Akhirnya, Hamdanah jadi jua kuliah di Fakultas Kadukturan. Barakat cangkal balajar wan jua utaknya mandukung, kurang labih 4 tahun kamudian Hamdanah kawa manuntungakan kuliah maraih galar SKed, atawa Sarjana Kadukturan.

Imbah hitu dilanjutakan pulang awan Co-Ass parak mandua tahun. Sakarang, kamanakan Palui nitu sudah rasmi manjadi saurang duktur, yakni dr. Hamdanah.

Urang-urang rami mamandir, asa kada parcaya jar buhannya, anak saurang tukang jahit di kampung, kawa manjadi saurang duktur. Nangkaya kisah sinitrun; ‘Tukang Bubur Naik Haji’, jar buhannya. Tapi bagitulah kisahnya dangsanak-ai, bahwa untung-nasib sasurang itu kada kawa ditangguh !

Palui himung wan basyukur banar baisian kamanakan saurang duktur. Inya bagawi di Puskesmas. Jalan satahun kamudianinya bajudu awan kuliganya saurang duktur di Puskesmas situ jua. “Mudah-mudahan kadua mampalai lakas bulihan katurunan, sarta manjadi kaluwarga nang Sakinah, mawaddah, warahmah!” ujar buhan Tulamak, Garbus, Tuhalus wan Tuhirang waktu basalaman wan pangantin di rumah Palui.

Jadi, ujar Garbus wayah takumpulan di gardu, “Kapala suku kita ini wayah hini samakin lapang banar pahinakan.”

“Napa maksud ikam, bus?” takun Palui.

“Maksudku.., Alhamdulillah usaha ikam samakin maju, ditambah pulang wayah hini ikam baisian kamanakan duktur dua ikungan,” ujar Garbus.

“I-ih… napa-napa tu kita mimang harus banyak-banyak maucap syukur, bus-ai. Tapi pulang, jangankan sakadar baisian kamanakan duktur laki-binian, paribasanya kita baisian ‘rumah sakit’ sakalipun, amun kawa tu, mudah-mudahan kita jangan sampai tatimpa sakit-garing. Sabab nang ngaran garing tu pasti kada nyaman!” ujar Palui sambil tatawa.

Takisah satahun kamudian, Palui kulihan Cucu matan kamanaknnya nang duktur nitu. Karna kasibukannya sabagai duktur laki-binian, maka marika handak mancari urang (baby sitter) gasan mahuan anaknya. Tapi ditangati ulih umanya, nini si bayi. “Kada usah gin mancari urang, aku kawa haja mahuan cucuku di rumah sambil bajajahit,“ jar nang Uma.

Satu timpu waktu dr Hamdanah bulik ka rumah, inya malihat uma-nya sadang mambarimakani nang cucu awan ‘pisang lubuk’. Hamdanah takajut, balalu sapuntan inya manangati uma-nya supaya anaknya jangan dimakani pisang lubuk.

“Mimangnya kanapa?!” takun nang Uma.

“Kasian.., parutnya masih lamah, ma-ai. Kaina pancarnaannya bisa taganggu“, jar Hamdanah dangan takzim.

“Cah…!!” jar umanya, “Ikam bahari gin labih halusan lagi pada cucuku ini kubarimakani pisang lubuk ha jua. Habis haja ampat-lima bigi sahari, nyatanya kawa ha ikam jadi duktur ..!!!” (Ifan, sahibul hikayat matan rawasari)

Sumber: Banjarmasin Post Edisi Cetak, tanggal 26 Oktober 2018

Palui menanggung biaya sekolah kemenakannya, Hamdanah, anak dari adiknya yang menjadi janda sejak suaminya meninggal. Dengan ketekunan dan dukungan Palui, Hamdanah tumbuh menjadi anak rajin dan cerdas hingga berhasil masuk…