Kesah Palui : Nyaman Dahulu

Palui, Garbus, dan Tulamak berbincang tentang keadaan zaman sekarang yang penuh keserakahan dan penderitaan rakyat. Garbus mengeluh banyak pejabat yang rakus dan tidak peduli halal haram demi kenyamanan sendiri. Palui menimpali bahwa hidup di masa lalu terasa lebih tenang dan sederhana. Tulamak setuju, mengatakan dahulu orang hidup cukup, hati senang, dan tidak banyak pikiran. Namun Garbus menolak, mengingat sejak zaman penjajahan hingga kini rakyat tetap menderita. Palui tetap berpendapat bahwa masa lalu lebih nyaman, karena dulu semua kebutuhan terpenuhi—meski akhirnya terungkap, yang dimaksud Palui adalah masa kecilnya dulu.

*****

WAYAH INI banyak bubuhan badahi nang rakus, kuluh wan handak nyaman saurangan haja, hantup sana hantup sini, halal atawa haram dianggapnya sama haja. Sedangkan rakyat hidupnya makin sakit, pancarian ngalih, barang-barang haraganya balarang, bujur-bujur sakit pada kayap.

“Manusia wayahini apalagi nang badahi wan nang badasi makin kada supan, makin kuluh dan makin sakahandaknya malinyak dan mangaramputi rakyat,” ujar Garbus mangesahakan wan Palui.

“Tapi hirannya bubuhan nang badahi wan nang badasi itu pina bacakut jua dan bahaharatan Bus ai,” ujar Palui manambahi.

“Maklum haja Lui ai, bubuhannya bacakut itu pun karna barabut razaki, barabut paruyek dan barabut uncui,” ujar Tulamak nang hanyar datang umpat manyurung pander.

“Malihat kaadaan nang saraba sakit ini maka aku bakasimpulan bahwa nyaman hidup wayah dahulu jua Mak ai,” ujar Palui pina sadih.

“Kalu kita ini mulai matan dahulu jua sakit, ujar paribahasa ‘sapangikih sapamatuk’ dicari sahari makan sahari,” ujar Garbus.

“Nyaman dahulu Bus ai, kada banyak nang dipikirakan, hati sanang, makan nyaman, baju salawar cukup,” ujar Palui.

“Itu wayah hidup kita makmur,” ujar Tulamak.

“Pabila hidup kita bakacukupan dan pabila negara kita ini makmur Mak? Mulai dahulu sampai wayahini mandarita tarus,” ujar Garbus mambantah pandapat Tulamak.

“Bujur Bus ai, nyaman dahulu dibanding wayahini,” ujar Palui maulangi pandapatnya mandukung pandapat Tulamak.

“Pabila … pabila hidup kita nyaman ? Mulai zaman Balanda, zaman Japang, zaman revulusi sampai wayahini nang ujarnya zaman repurmasi, zaman parubahan tatap ai sakit tarus,” ujar Garbus kada hakun kalah.

“Kalu pandapatku tatap nyaman dahulu Bus ai,” ujar Palui.

“Mana buktinya Lui?” Kada usah ba-agak, sama haja malaratnya,” balas Garbus.

“Buktinya dahulu baras kada manukar, duit maminta, baju salawar ditukarakan, disakulahakan, kada mamikirakan bacari karna samunyaan sudah tasadia,” ujar Palui.

“Siapa nang hakun manyadiakan Lui?” ujar Garbus.

“Nang manyadiakan adalah abah-umaku saurang karna sidin sayang wan aku,” ujar Palui ba-agak.

“Ooo … maksud ikam wayah lagi halus dahulukah Lui?” ujar Garbus kakalahan karna hanyar paham. (mht/rep)

Sumber: Banjarmasin Post Edisi Cetak, tanggal 29 Desember 2018

Palui, Garbus, dan Tulamak berbincang tentang keadaan zaman sekarang yang penuh keserakahan dan penderitaan rakyat. Garbus mengeluh banyak pejabat yang rakus dan tidak peduli halal haram demi kenyamanan sendiri. Palui…