Kesah Palui : Haruk Sapasaran

Palui mendapat tugas menjaga anak dan berbelanja ke pasar, sementara istrinya memasak di rumah. Saat pulang, Palui tampak kesal dan mengeluh karena di seluruh pasar ia mencium bau tidak sedap seperti bau kotoran hingga hampir muntah. Istrinya heran, lalu menyuruhnya bercermin. Palui menolak karena merasa dirinya tampan dan gagah, tapi akhirnya menurut. Begitu bercermin, ia terkejut melihat ada kotoran menempel di hidungnya. Istrinya pun menjelaskan bahwa kotoran itu berasal dari anak mereka saat Palui memandikannya. Palui malu dan sadar, bau busuk itu ternyata berasal dari dirinya sendiri.

******

SABAN baisukan palui laki-bini babagi tugas rumah tangga. Hari ini palui dapat tugas maurus anaknya nang masih halus wan batatukar ka pasar, nang bini bamasak wan batapas baju. Wayah parak siang Palui bulik ka rumah muhanya pina takarucut wan satumat-satumat pina manjaluak.

“Kanapa muha pian pina masam abahnya?” ujar bini palui marawa lakinya nang hanyar datang dari pasar.

“Wayah bakuliling pasar itu kaciumanku sapasaran babau haruk sampai babarapa kali handak muak,” ujar Palui.

“Babau haruk kaya apa,” ujar bininya.

“Pukuknya babau haruk kaya bau tahi,” sahut Palui pina manjalujuk handak muak.

“Jadi babau haruk sapasaranlah?” ujar bininya.

“Bujur,babau haruk sapasaran baik wayah dilos timbaku, los kain bahkan di los minyak harumpun babau haruk jua,” ujarnya.

“Salah sampiyan jua,” ujar bini Palui.

“Kanapa maka aku nang disalahakan,” sahut Palui.

“Cuba pang sampiyan bacaramin,” ujar bininya manyuruh.

“Kanapa maka aku disuruh bacaramin muhaku langkar haja, tadi di pasar banyak bibinian marawa aku,” ujar Palui ba-agak.

“Ayu langkar …..ayu bungas,” ujar bininya mahuhulut.

“Karna aku langkar wan bungas itulah maka ikam sampai tagila-gila wan aku,” ujar Palui manyirit bininya.

“Lakasi sampiyan bacaramin supaya makin kalihatan gagahnya,” ujar nang bini manggasak.

Lalu Palui sambil mamusut sisingut mamaraki caramin, “hauuu…… umanya!, ujar Palui takuriak.

“Kanapa maka takuriak abahnya?, sahut bininya.

“Umanya……umanya tulung ambilakan banyu gasan mambasuh sisingutku!, ujar Palui.

“Nah, hanyar sampiyan paham kanapa maka aku manyuruh bacaramin. Karna disisingut sampiyan itu tadi ulun lihat ada tapalit tahi, makanya pancium sampiyan sapasaran babau haruk babau tahi,” ujar bininya.

“Tahi siapa ding nang tapalit ka sisingutku,” ujar Palui.

“Tadi wayah sampiyan handak tulak ka pasar sawat mambasuhi anak kita bahira kalo, rupanya wayah itulah tapalitnya,” ujar bini Palui manawaakan.

“Pantas sapasaran tadi babau tahi, untung haja aku kada mancium ikam dinglah, ujar Palui kakalahan. (mht/ rep)

Sumber: Banjarmasin Post Edisi Cetak, tanggal 4 Januari 2019

Palui mendapat tugas menjaga anak dan berbelanja ke pasar, sementara istrinya memasak di rumah. Saat pulang, Palui tampak kesal dan mengeluh karena di seluruh pasar ia mencium bau tidak sedap…