Kesah Palui : Lampu Habang Hijau

Palui dan Garbus membicarakan kekacauan lalu lintas di Banjar. Menurut Palui, lampu merah, kuning, dan hijau tidak lagi berfungsi karena banyak orang melanggarnya sesuka hati. Garbus menjelaskan bahwa lampu itu dibuat untuk keselamatan, tetapi disiplin masyarakat yang kurang membuat aturan tak dihiraukan. Palui menambahkan bahwa bahkan lampunya kadang rusak, membuat keadaan makin parah. Mereka sepakat bahwa perilaku pengendara, bukan pejalan kaki, yang menjadi penyebab utama kekacauan. Akhirnya Palui pasrah, mengatakan bahwa di zaman serba semaunya ini, keselamatan hanya bisa dijaga sendiri, bahkan di rumah pun bisa celaka.

*****

SASAR hari Banjar sasar camuh. Sabarataan sakahandak hati. Sungai ditutup, jalanan bakipit karna dipakai gasan bajualan lalu maulah macet, satiap ada wadah ditajaki reklame raksasa. Balum lagi nang bakandaraan sakahandak hati. Jalan urang dipakai, lampu habang dirampak. Karna rancak handak dirampak urang, Palui bakisah wan Garbus.

“Banua kita ini tamasuk nang anih Bus ai,” ujar Palui.

“Napa bukti anih itu Lui?” ujar Garbus.

“Lampu-lampu habang kuning hijau di tiap simpangan itu kadada gunanya,” ujar Palui.

“Lampu habang hijau itu justru maksudnya gasan manyalamatakan manusia supaya jangan cilaka, bila habang maksudnya bamandak, kuning supaya hati-hati wan hijau bulih jalan tarus,” ujar Garbus.

“Tapi kanyataannya kaya apa Bus?” ujar Palui.

“Kanyataannya mimang dilanggar, kada dihirani. Tapi itu kada salah lampu habang hijau Lui ai,” ujar Garbus.

“Jadi nang salah adalah urang nang malanggarnya, lantaran kita hanyar balajar badisiplin. Tapi bahanu ada jua lampunya nang salah Bus ai, karna kada diharagu maka ada nang mati, ada jua nang habang atau hijau tarus-tarusan,” ujar Palui.

“Kalu kaya itu bubuhan nang manangani urusan lampu itu nang hanyar balajar badisiplin,” ujar Garbus mambalas.

“Lampu lalu lintas habang hijau itu tamasuk moderen Bus ai, tamasuk teknik tinggi, makanya haraganya larang banar,” ujar Palui pina saraba tahu urusan lampu habang hijau itu.

“Jadi kalu kaya itu kaya apa baiknya Lui, dilampui kada dipatuhi, bila kada dilampui makin samarawut wan macit jalanan kita,” ujar Garbus.

“Wayah ini kita masih zaman ipuria, jadi tiap urang pina sakahandaknya haja malanggar aturan,” ujar Palui.

“Kalu kaya itu biarakan haja kada baaturan, biar haja barampak, basinggul atawa bahantam,” ujar Garbus.

“Kalu kaya itu tabulik pulang zaman siapa kuat pasti manang, kasian rakyat nang bajalan batis,” ujar Palui.

“Sabujurnya nang kada tahu aturan itu kada rakyat nang bajalan batis tapi malah nang bamutur, nang basapida mutur, nang bataksi wan mutur trak,” ujar Garbus manyambung ucapan Palui bahwa rakyat nang bajalan batislah nang kasian kana singgul, tagapit wan nang tarampak.

“Labih kasian lagi Bus ai, bila ada nang imbah marampak lalu langsung bukah,” ujar Palui.

“Itulah salah satu tanda ipuria balalu lintas di jalanan, makanya kalu handak salamat bakurung ai di kalambu,” ujar Garbus.

“Bakurung di kalambu babahaya jua Bus ai, karna bisa kada baaturan jua marampaknya wan gagal KB,” ujar Palui sambil lihum lantaran sudah putus asa mamandir samarawutnya di jalanan. emhati(repro)

Sumber: Banjarmasin Post, tanggal 6 Februari 2019

Palui dan Garbus membicarakan kekacauan lalu lintas di Banjar. Menurut Palui, lampu merah, kuning, dan hijau tidak lagi berfungsi karena banyak orang melanggarnya sesuka hati. Garbus menjelaskan bahwa lampu itu…