Kesah Palui : Tarifnya Dubel

Palui, Garbus, dan Tulamak berkunjung ke Jakarta dan merasa tidak betah. Tulamak mengeluh, bukan karena makanan atau kekurangan uang, tetapi karena suasana kota yang ramai dan serba mahal. Palui pun setuju, terutama soal biaya kebutuhan dasar seperti air dan toilet. Ia menceritakan pengalaman lucu saat harus membayar Rp1.500 untuk buang air, karena petugas beranggapan orang yang buang air pasti sekalian mandi. Tulamak tertawa mendengar alasan itu dan berencana mencari cara agar tidak perlu membayar ganda. Mereka akhirnya sepakat bahwa hidup di kampung lebih nyaman, murah, dan alami dibanding kota besar.

*****

BUBUHAN Palui wan kakawalannya sawat jua bajajalanan sampai ka Jakarta. Ada pang saminggu bubuhannya di sana umpat badiam di rumah mamarinanya Garbus.

“AKU muyak banar di Jakarta ini,” ujar Tulamak.

“Kanapa maka kaya itu Mak? Apakah karna kada cucuk makanan?” sahut Garbus.

“Kalu sual makanan kadada kalihnya Bus ai, asal jangan gangan kalum haja,” ujar Tulamak.

“Kalu kada karna makanan, lalu karna apa? Apakah karna sangunya pas-pasan?” ujar Garbus.

“Sual sangu sudah dihitung, bahkan galang jam wan utaspun sudah dihitung jua,” ujar Tulamak.

“Aku parcaya ikam badua ini muyak di banua urang kada karna kakurangan uncui tapi karna kaganangan wan pahumaan nang paharatan rami-raminya malacak maklumlah hanyar kawin,” ujar Palui manyindir.

“Kada karna alasan itu Lui ai. Kalu handak malacak di sinipun banyak banar pahumaannya, sakahandak manajak,” balas Tulamak.

“Sababaiknya pahumaan di banua urang rasanya cucuk nang di banua saurang jua karna barasih dan rumputnya masih mambulu anak haja,” sahut Garbus lihum.

“Kalu kaya itu alasan bubuhan ikam itu sama haja wan aku,” ujar Palui ma-akuri.

“Jadi napa alasan ikam taumpat muyak balawas-lawas di Jakarta ini?” ujar Tulamak.

“Alasanku muyak di sini karna bahira wan bakamih larang banar, padahal di banua kita kada babayaran,” ujar Palui.

“Biasa haja di kuta ganal napa haja babayar, naik ujek, naik bajaj, naik bis, baparkir, masuk taman tamasuk bakamih wan bahira itu Lui ai,” ujar Garbus.

“Bujur haja babayar tapi harus sasuai wan layanannya. Pangalamanku wayah handak bahira wan bakamih kulihat di kakus umum ada tulisan ‘bakamih Rp500 dan bahira Rp1.000’. Karna parutku sakit banar maka wayah handak bahira kusiapkan duit Rp1.000 lalu aku masuk ka WC itu,” ujar Palui.

“Imbah tuntung bahira aku langsung kaluar dan mambayar Rp1.000. Wayah duit ribuan itu kujulung wan patugasnya, inya manulak dan sarik dan minta tambahan lagi Rp500, jadi Rp1.500,” ujar Palui.

“Hau kanapa maka jadi Rp1.500 Lui padahal ikam cuma bahira haja?” ujar Tulamak hiran.

“Patugas itu mamadahakan ungkusnya jadi Rp1.500 karna tiap urang nang bahira pasti bakamih makanya dikanai tarif dubel sebab ujarnya kada mungkin urang bahira kada bakamih,” ujar Palui tapaksa mangalah mambayar Rp1.500.

“Hi’ih-lah dasar bujur alasan patugas itu,” ujar Tulamak ma-akuri lalu inya bagagas bukah bakamih ka higa kakus mahindari bayar Rp500. (tam)

Sumber: Banjarmasin Post Edisi Cetak, tanggal 7 Februari 2019

Palui, Garbus, dan Tulamak berkunjung ke Jakarta dan merasa tidak betah. Tulamak mengeluh, bukan karena makanan atau kekurangan uang, tetapi karena suasana kota yang ramai dan serba mahal. Palui pun…