kesah Palui : Handak Kawin

Tulamak terlihat banyak berpikir hingga membuat Garbus dan Palui penasaran. Setelah didesak, akhirnya terungkap bahwa yang dipikirkannya adalah keinginannya memiliki anak. Meski hidupnya dengan istri sangat rukun dan berkecukupan, mereka belum juga dikaruniai keturunan setelah bertahun-tahun menikah. Palui menebak bahwa mungkin Tulamak ingin menikah lagi, dan ternyata benar—ia tergoda dengan seorang janda beranak tiga bernama Mina. Palui bahkan menyarankan Tulamak untuk meminta izin istrinya agar niatnya mendapat keturunan bisa tercapai dengan cara yang baik dan tidak menimbulkan masalah rumah tangga.

*****

SAMINGGUAN ini Tulamak kalihatan pina ada nang dipikirakan banar. Rancak inya taungut saurang, tapi nang anihnya satiap ditakuni kakawalannya jawabannya pasti kada napa-napa.

“Mamikirakan napa Mak? Biasanya, kaya apa haja baratnya parsualan kada mungkin sampai batahun-tahun jadi pikiran. Apakah parsualan gawian, parsualan warisan, parsualan kasihatan, parsualan rumah tangga atawa
parsualan kaluarga,” ujar Garbus.

Tamasuk jua di antaranya Bus ai,” sahut Tulamak.

“Di antara nang kusambati itu parsualan mana nang paling barat dan jadi pikiran,” ujar Garbus handak umpat mambantu.“ Aku ini mungkinnnn…,” ujar Tulamak.

“Aku kawa manangguh, ucapan mungkinnn… Tulamak itu musti maksudnya, mungkinkah inya kawin lagi?” ujar Palui nang hanyar datang umpat manjawabakan.

“Justru sabaliknya Lui ai, bini nang ada ini haja kada kaawakan,” ujar Tulamak.

“Nah, tasalah jawaban ikam Lui ai. Tulamak laki bini rukun banar makanya kada mungkin inya kawin lagi,” ujar Garbus umpat malawanakan Tulamak.

“Bungul-bungul aku Bus ai, aku bapander dan manangguh kabingungan Tulamak ini berdasar parhitunganku secara luas dan mendalam dan mamandangnya dari berbagai segi,” ujar Palui pina musti kaya urang pintar haja.

“Bah… harat banar ikam Lui lah, pina kaya nujum haja, saraba tahu. Jadi kalu kaya itu napa nang jadi pikiran Tulamak batahun-tahun itu?” ujar Garbus.

“Manurut tangguhan dan parhitunganku Tulamak musti handak kawin lagi karna inya lalakian, umurnya sudah tuha dan harta warisannya banyak,” ujar Palui.

“Bujurkah Mak tangguhan Palui itu?” ujar Garbus mahimati.

“Kira-kira, kurang labih kaya itulah,” sahut Tulamak lihum.

“Aku mangira kada mungkin karna hidup ikam laki bini ruhui banar, pina basasayangan haja, hidup bakacukupan, tamasuk kaluarga sakinah,” ujar Garbus.

“Sabuting nang kada kumiliki Bus ai, makanya jadi pikiranku banar batahun-tahun ini.

Ucapan Palui itu bujur banar tapi tulung jangan digaluakan, jangan disampaiakan wan biniku,” ujar Tulamak mambisiki Garbus.

“Napa nang kada ikam miliki Mak. Ikam saraba bakacukupan kalu?” ujar Garbus. “Nang kadada dimiliki Tulamak adalah generasi penerusnya. Tulamak handak banar baisi anak tapi bininya tamanang. Puluhan tahun kawin balum jua baisian anak,” ujar Palui.

“Hahahaaa… pantas haja sudah babulan-bulan ini Tulamak pina malelek si Mina nang lamak mungkal, si balu baranak talu itu,” ujar Garbus mangalakak tatawa.

“Karna ini urusan baik, maka baiknya minta izin haja wan bini ikam Mak ai, pasti inya mangabulakan karna kada ngalih-ngalih maulah langsung pakulih talu ikung anak,” ujar Palui manyaranakan.“

Tarima kasihlah Lui. Pikiran ikam itu pas banar karna ikam dua talu kali bapangalaman,” ujar Tulamak manyalami Palui. (tam)

Sumber: Banjarmasin Post Edisi Cetak, tanggal 9 Februari 2019

Tulamak terlihat banyak berpikir hingga membuat Garbus dan Palui penasaran. Setelah didesak, akhirnya terungkap bahwa yang dipikirkannya adalah keinginannya memiliki anak. Meski hidupnya dengan istri sangat rukun dan berkecukupan, mereka…