Kesah Palui : Mambarakat Jua

Setelah salat Ashar, Palui dan kawan-kawannya diundang ke acara tapung tawar di rumah Surawin. Meskipun acara itu untuk perempuan, mereka datang karena Surawin menyediakan banyak wadai Banjar. Mereka makan dengan lahap hingga kenyang, lalu diam-diam berencana membawa pulang sisa makanan. Ada yang pakai plastik bekas sandal, ada pula kertas timbaku untuk membungkus. Sementara Palui memilih tidak membawa apa-apa. Saat pulang, kupiah Palui miring dan meneteskan cairan merah. Ternyata di balik kupiahnya tersembunyi kalalapon yang meleleh terkena panas, membuat semua tertawa melihat “darah manis” di kepala Palui.

*****

BULIKAN sambahyang Ashar di langgar, bubuhan Palui lawan kakawalannya Garbus, Tulamak, Tuhirang disaru ka rumah kaluarga Surawin nang hanyar batapung tawar kamanakannya. Tapung tawar ini sabujurnya gasan bibinian haja, tapi banyak nang bahalangan hadir, makanya Surawin manyaru bubuhannya karna banyak banar makanan nang disadiakan.

“Maaflah kami bagagasakan manyaru, tapung tawar ini kada bamakanan tapi basurungan wadai-wadai haja. Makanya wayah salamatannya kamarian imbah Ashar haja, doanya sudah dibacakan bidan jadi kita tinggal mamakannya,” ujar Surawin.

“Kalu kaya itu biar saban kamarian ikam batapung tawar kami sabarataan katuju haja,” sahut Palui.

Imbah tuntung basusurung ampat-lima macam wadai Banjar, Surawin manyuruhakan mamakani sampai habis sampai kanyang karna mamarinanya banyak banar baulah kada bahabisan.

“Ini tatumbuk banar, pas parut lapar ada urang basalamatan,” ujar Tulamak nang katuju bamamakan.

Tulamak tarik tarus, bubur putih bubur habang, apam sarabi, cingkaruk, lamang hintalu, kolak lawan kalalapon. Kawalnya nang lain mamakan jua tapi sambil bapikir kalu hantam samunyaan kada nyaman rasanya, maka inya baaakalan kaya apa supaya kawa mambawa bulik gasan dimakan di rumah. Handak bapadah asa supan karna kalau disambatnya tukang bantas.

Imbah Surawin masuk ka dalam, maka bubuhannya karambisikan bapandir kaya apa caranya supaya kawa mambawa bulik.

“Aku ada palastik bakas pambungkus sandal,” ujar Tuhirang.

“Aku ada jua kartas pambungkus timbaku. Ikam pang Lui, kaya apa mambawanya,” Garbus batakun.

“Aku bakalah haja kada mambawa apa-apa, sudah tuhuk sudah kanyang mamakan di sini, manyupanakan,” sahut Palui.

Imbah tuntung makan minum, bubuhanya bulikan, masing-masing menyimapani bawaannya supaya kada katahuan Surawin, ada nang mangapit di katiak, ada nang mamuntal di tapih.

Rami inya bakisah saruan bakakajutan, kanyang bakakajutan, mambarakat pulang. Sambil bajalan Palui babarapa kali mambujurakan kupiahnya nang magin tamiring ka kanan. Nang lainnya umpat mahatiakan kupiah Palui, kanapa pina balunjung ka higa, lalu pina babanyuan malilih ka higa talingannya.
“Lui…..kanapa kapala ikam, lukakah pina balimut lawan darah,” ujar Garbus managur.

“Iih luka tadi kana batu katikan kakanakan,” sahut Palui.

“Jangan dibiarakan kaina makin babangat, tapi kanapa darahnya pina habang kaya juruh,” sambung Tulamak sambil inya mamaksa mamacul kupiah Palui.

“Aaiiii……sakalinya Palui mambarakat jua, hibak kupiah lawan kalalapon, balilihan gulanya sampai ka gulu sampai ka baju, ujarnya taimbai sabarataan. emhati(repro)

Sumber: Banjarmasin Post Edisi Cetak, tanggal 2 Maret 2019

Setelah salat Ashar, Palui dan kawan-kawannya diundang ke acara tapung tawar di rumah Surawin. Meskipun acara itu untuk perempuan, mereka datang karena Surawin menyediakan banyak wadai Banjar. Mereka makan dengan…