Kesah Palui : Kapadasan

Kesah Palui : Kapadasan

Palui dikenal pantang menolak makanan apa pun, selalu lahap dan tak pernah pilih-pilih. Saat berbincang dengan Garbus dan Tulamak, mereka saling mengolok kebiasaan makan masing-masing. Palui menegaskan bahwa semua makanan ia sukai, kecuali “tahu basanga” yang menurutnya sangat pedas. Ia menceritakan pengalamannya pertama kali mencoba tahu, disangka seperti wadai, dimakan sambil berjalan dengan cabai. Karena dianggap jajanan, ia makan tanpa piring, dan ketika tersenggol orang, makanannya jatuh ke tanah. Malu mengambilnya, Palui pulang sambil menahan pedas dari cabai yang sudah lebih dulu ia makan.

*****

KALU sual makanan napa haja Palui kada batampik. Kadada pamantang atawa panyakit, napa haja hantup tarus. Bila disurung nasi sakenceng, sakencengan pasti habis.

“Artinya liur ikam itu adalah liur baik Lui ai,” ujar Garbus mamadahi Palui.

“Sama wan aku,” ujar Tulamak umpat manyahut.

“Kalu ikam Tulamak ai di samping liur baik jua tamasuk liur baungan,” ujar Garbus.

“Si Tulamak itu kada cuma liur baungan tapi inya itu adalah baung-nya,” ujar Palui.

“Sual makanan jangan ditampik karna itu adalah razaki,” balas Tulamak kada hakun kalah.

“Karna kada manampik itulah maka awak ikam gonggong kaya guguling,” ujar Palui.

“Biar haja gonggong asal sihat,” balas Tulamak.

“Wayahini banyak banar macam-macam makanan, di samping makanan dan wadai-wadai kita urang banjar ada jua makanan matan Jawa, matan Makassar, matan Palembang,” ujar Palui.

“Di antara samunyaan makanan itu, makanan napa nang paling ikam katujui Lui?” ujar Garbus.

“Sudah kupadahakan bahwa samunyaan makanan kukatujui sama wan Tulamak,” balas Palui. “Cuma aku biasa tapakalah wayah mamakan ‘tahu basanga’ karna tahu basanga itu padas banar,” ujarnya.

“Palui pangaramput,” sahut Tulamak, “iwak tahu itu kada padas tapi masin.”

“Wayah itu aku hanyar tarasani makanan tahu, kulihati urang mamakannya kaya makan wadai, lalu aku umpat jua manukarnya. Karna dianggap wadai maka mamakannya wan lumbuk parawit babigi. Sabalah tangan kanan maingkuti tahu dan tangan kiri maingkuti lumbuk babigi lalu mamakannya sambil bajalan. Jadi mamakannya saigutan tahu, saigutan jua lumbuknya,” ujar Palui bakisah.

“Jadi mamakannya kada bapiringlah Lui?”

“Sudah kupadahakan mamakannya kaya makan wadai sambil bajalan, mula-mula kuigut lumbuknya padas banar, dan wayah aku handak maigut ‘wadai tahu’ sakalinya disinggul urang lalu tagugur ka tanah nang balucak,” ujar Palui.

“Ikam ambilah wadai nang gugur itu,” ujar Tulamak.

“Aku supan ma-ambilnya lalu babulik pulang kapasar handak manukar panggantinya tapi tanyata sudah habis. Makanya bulang bulik itu, muntungku tanganga baliuran mamakan lumbuk parawit nang saling padasan,” ujar Palui. (mht/rep)

Sumber: Banjarmasin Post Edisi Cetak, tanggal 3 Maret 2019

Palui dikenal pantang menolak makanan apa pun, selalu lahap dan tak pernah pilih-pilih. Saat berbincang dengan Garbus dan Tulamak, mereka saling mengolok kebiasaan makan masing-masing. Palui menegaskan bahwa semua makanan…

Tinggalkan Balasan

Alamat email Anda tidak akan dipublikasikan. Ruas yang wajib ditandai *