Kesah Palui : Kapala Kambing

Tulamak mengadakan acara aqiqah untuk anak lelakinya dan menyembelih dua ekor kambing. Palui tak bisa hadir karena harus ke Banjar menjemput istrinya, namun keesokan harinya ia datang untuk meminta maaf. Tulamak menyambut hangat dan menyuguhkan kepala kambing, makanan kesukaan Palui. Palui pun lahap menyantapnya tanpa tahu bahwa hidangan itu adalah bagian favorit istri Tulamak yang disimpannya di lemari. Melihat Palui memakan kepala kambing itu, istri Tulamak marah besar dan terus melotot ke arah mereka. Menyadari situasi tegang, Palui buru-buru pamit, sementara istri Tulamak melempar payung sambil memukul suaminya karena menyuguhkan makanannya pada orang lain.

*****

TULAMAK manyaru bubuhan kakawalannya Palui, Garbus, Tuhirang wan tukacut, kaina malam basalamatan maaqikahi anaknya nang hanyar lahir. Karna anaknya itu lalakian jadi inya manyumbalih dua ikung kambing.

Tapi wayah acara rupanya Palui kada datang karna inya harus tulak ka Banjar mailangi paniniannya.

Isuknya si Palui datang ka rumah Tulamak handak minta maaf karna malamnya kada kawa datang saruan baaqikahan.

“Aku maaf banar samalam kada datang karna tulak ka Banjar mailangi paninian, hari hujan labat tapaksa tapamalam,” ujar Palui.

“Aku maklum haja Lui ai,” ujar Tulamak manyuruhakan Palui duduk lalu inya langsung kabalakang ma-ambilakan makanan wan nginuman.

“Pas banar Lui ai, ikam kutinggali kapala kambing, silakan makan,” ujar Tulamak.

“Ikam paham banar kasukaanku Mak ai,” ujar Palui sambil mulai makan mahantup utak kapala kambing.

Kada lawas datang bini Tulamak, takajut malihat Palui makan kapala kambing nang disimpaninya dalam lamari.

Mulai matan higa lawang bini Tulamak babarapa kali mancelengi lakinya. Wayah mancelengi lakinya itu sawat kalihatan ulih Palui, lalu Palui marasa bahwa bini Tulamak sarik maka Palui makin bacapat mahabisakan nasinya.

“Ayu lakasi batambah, nasi masih banyak dan habisakan utaknya,” ujar Tulamak manyuruh Palui.

“Aku sudah kanyang, kulihat langit maram mungkin cagar ada patir,” sahut Palui karna inya maklum sudah babarapa kali kana celengi bini Tulamak.

“Kada usah lakas bulik Lui ai, kada mungkin ada patir karna hari panas banar,” ujar Tulamak karna inya kada paham bininya saceleng-celeng.

Palui langsung badiri, parmisi lalu handak bulik.

“Hadangi-hadangi,” ujar bini Tulamak bagagasakan maacungakan payung. Malihat bini Tulamak pina mahahing lawan payung maka Palui makin takutan lalu langsung bukah saling lajuan karna mulai matan makan tadi
bini Tulamak itu dilihatnya pina sacelengceleng.

“Kanapa maka ikam handak mamangkung Palui,” ujar Tulamak.

“Aku kada handak mamangkung Palui tapi handak manitipakan payung bininya nang katinggalan di rumah kita,” ujar bini Tulamak lalu mamukulakan kaawak lakinya karna kasasarikan kapala kambing kasukaannya disurungakan ka Palui. (tam/rep)

Sumber: Banjarmasin Post, tanggal 7 Maret 2019

Tulamak mengadakan acara aqiqah untuk anak lelakinya dan menyembelih dua ekor kambing. Palui tak bisa hadir karena harus ke Banjar menjemput istrinya, namun keesokan harinya ia datang untuk meminta maaf.…