Kesah Palui : Tatinggal Salup

Setiap hari Ahad, Palui bersama istrinya kerap menghadiri undangan pernikahan meski sering kali malas karena jarak yang jauh dan cuaca yang tidak menentu. Namun, mereka tetap datang agar tidak dianggap sombong oleh tetangga. Seperti biasa, Palui dan istrinya berdebat soal berapa uang yang akan dimasukkan ke amplop, sementara Palui mengeluh tentang kebiasaan orang yang menghitung untung rugi dalam menghadiri hajatan. Akhirnya, mereka memutuskan berangkat menggunakan mobil Tulamak yang kebetulan lewat. Saat turun dari mobil, istri Palui kebingungan mencari sandal yang ternyata tertinggal di tempat mereka naik, karena tadi ia melepasnya agar tidak mengotori karpet mobil yang bersih. Palui pun hanya bisa menggeleng sambil menertawakan “kepintaran” istrinya yang kini terpaksa berjalan tanpa sandal.

*****

KAYA urang jua bila hari Ahad Palui saruan ka urang bakakawinan. Maka nang manyaru ini samunyaan patuh, bila kada kaluarga pasti kakawalan di kampung atawa kawal maujek di pasar.

Jadi inya laki bini tapaksa mandatangi karna kada nyaman bila batamuan kaina lalu ditakunakan kanapa maka kada datang wayah baaruhan tadi.

Makanya saraba ngalih lalu tapaksa jua didatangi. Padahal rumah nang bakakawinan itu biasanya andaknya jauh-jauh jadi batangah hari bakuliling kahulu kahilir.

Baik amun hari tarang haja karna biasanya bila takana musim panghujan tapaksa bajimusan baju salawar kaya itu jua nang bini sampai luntur pupur wan gincunya.

“Barapa kita maisi amplupnya, ujar nang bini batakun.

“Kita ini saraba ngalih bila saruan kaurang nang sugih, handak mambari sadikit asa kada purun tapi handak mambari banyak duitnya nang kadada,” sahut Palui.

“Mambari sukarila haja, anggaplah saharaga makan sapiring nasi di pasar. Karna urang nang baaruhan itu paham haja kada musti maharapakan barian urang nang saruan,” ujar nang bini.

“Bujur jua ujar ikam itu ding ai, tapi bahanu ada jua urang nang pina bahitung banar untung rugi bila baaruhan. Wayah ini ada pulang mudel urang basaruan nang dalam undangannya ada tulisan maaf kada manarima bingkisan ataupun karangan bunga,” ujar Palui.

“Sampiyan kada usah basasambat urang lain, tasarah nang ampun gawi haja sahut bini Palui sambil manyanyarik. Ayu lakasi kita tulakan saruan ka undangan di Loktabat,” ujar bininya.

“Kalu kasitu aku kada sanggup baujek kauyuhan, baiknya kita naik taksi haja matan rumah ka pasar hanyar Antasari lalu tarus ka taksian Pal Anam, ujar Palui.

Di taksian Pal Anam, Sambil badirian dipinggir jalan mahadang mutur colt ka Martapura, kada lawas bamandak mutur sidan baplat habang dihadapan Palui.

“Siapa abahnya maka mutur itu bamandak?” ujar nang bini.

“Oooo…. ikamlah Tulamak, mutur siapa nang ikam supir? Siapa nang ikam bawa, tapi muturnya kanapa puang haja, ujar Palui.

“Aku disuruh mamarinaku maambili sidin di Martapura, maka nya aku tulak saurangan haja. Amun ikam handak ka Loktabat lakasi babuat kaina kuturunakan dimana ikam handak saruan,” ujar Tulamak.

Imbah Palui wan bininya babuat mahalunyur mutur sidan itu laju ampah ka Martapura. Nang bini tasandar kanyamanan hanyar biasa babuat di mutur sidan hanyar babau harum wan ba-ac.

“Parak jambatan itu bamandak karna kami saruan ampah kadalam sadikit, biar haja kami bajalan batis,” ujar Palui.

Imbah bamandak lalu Palui wan bininya turunan, sambil inya maucapakan tarimakasih wan Tulamak, nang bini batunduk ampah kabawah mutur sambil palingau-palingau ada nang dicariinya.

“Napa nang ikam cari ampah ka bawah mutur itu ding?” ujar Palui.

“Salupku kadada lagi, tadi wayah handak naik mutur salup kupacul karna asa kada sampai hati manjajak tikar karpetnya hanyar wan barasih banar,” sahut bini Palui.

“Naaaahhhh……tasalah banar ikam umanya ai, salup nang ikam pacul tadi tatinggal di Pal Anam. Musti haja sudah hilang diambil urang. Kaya inilah kapipintaran baisi bini nang hanyar tarasani babuat di mutur sidan,” ujar Palui bamamai sambil mangganding bininya nang bajalan pilai kada sing sandalan. (mht/rep)

Sumber: Banjarmasin Post Edisi Cetak, tanggal 6 Maret 2019

Setiap hari Ahad, Palui bersama istrinya kerap menghadiri undangan pernikahan meski sering kali malas karena jarak yang jauh dan cuaca yang tidak menentu. Namun, mereka tetap datang agar tidak dianggap…