Kesah Palui : Kumisi

Palui dianggap beruntung karena meski belum punya pekerjaan tetap, ia diajak oleh pambakal untuk bekerja di kantornya. Gajinya kecil, tetapi sering mendapat uang tambahan karena dipercaya dan rajin membantu. Garbus dan Tulamak penasaran dengan tugas Palui, sebab meski disebut pegawai lapas, ia mengaku sebagai pembantu pambakal. Ia menceritakan pekerjaannya mulai dari menyiapkan minuman, membersihkan meja, hingga menyemir sepatu pambakal. Namun Palui bangga karena sering diajak menghadiri berbagai komisi. Setelah dijelaskan, ternyata “komisi” yang dimaksud hanyalah pintu rapat tempat ia duduk-duduk menunggu. Akhirnya, Garbus dan Tulamak menertawakannya karena ternyata Palui hanya tukang jaga pintu rapat.

*****

PALUI tamasuk urang nang bauntung banar. Wayah kakawalannya baluman baisian gawian, inya malah dibawai Pambakal bagawi di kantur sidin. Bujur haja pang gajinya halus tapi ujar habar banyak luarannya karna Palui itu tapakai banar.

“Napa-napa gawiannya Mak?” ujar Garbus batakun wan Tulamak.

“Sabujurnya aku kada tahu jua napa nang digawinya,” ujar Tulamak.

“Palui itu utaknya dasar incer jadi bisa mahamba di mana-mana,” ujar Garbus pina bahiri.

“Daripada kita manangguh nang kada-kada baiknya kita takuni saurang wan urangnya,” ujar Tulamak sambil manunjuk Palui nang hanyar datang.

“Sabujurnya napa gawian ikam Lui?” Garbus.

“Samalam sudah kupadahakan bahwa walaupun aku pagawai lapas tapi jabatanku adalah pambantu Pambakal,” ujar Palui.

“Wah, dasar harat ikam Lui kawa jadi pambantu pambakal. Napa-napa nang dibantu Lui?” ujar Tulamak.

“Macam-macam nang kubantu, maulahakan nginuman sidin, mambarasihi mija, manyapu sampai manyamirakan sipatu sidin,” ujar Palui pina ba-agak.

“Gawian ikam itu ngarannya jongos Lui,” ujar Garbus manumpalak.

“Walaupun jongos tapi aku salalu dibawai sidin umpat di barbagai kumisi,” ujar Palui pina himung.

“Wah… harat lagi kalu ikam kawa umpat duduk di kumisi, kaya angguta MPR wan angguta DPR haja ada kumisi-kumisinya?” ujar Tulamak.

“Napa nang digawi dikumisi itu Lui?” ujar Garbus.

“Aku tabanyak baranai daripada bagawi,” sahut Palui.

“Kalu kawa umpat di kumisi itu artinya ikam tamasuk urang harat dan pasti sibuk wan gawian, tapi kanapa maka ikam banyak baranai?” ujar Garbus jadi bingung jabatan Palui.

“Aku baranai itu, duduk-duduk di muhara lawang mahadangi bubuhannya bulik rapat, salajur mahadangi kumisinya,” ujar Palui.

“Palui, Paluiiii… sakalinya gawian ikam itu adalah preman jua Lui ai, alias gawian tukang hantai dan tukang tadah,” ujar Tulamak manumpalak. (ivd/mht)

Sumber: Banjarmasin Post, tanggal 4 April 2019

Palui dianggap beruntung karena meski belum punya pekerjaan tetap, ia diajak oleh pambakal untuk bekerja di kantornya. Gajinya kecil, tetapi sering mendapat uang tambahan karena dipercaya dan rajin membantu. Garbus…