Kesah Palui : Banjir, Banjir

Garbus kesal karena Palui hanya membongkar mesin sepeda motornya tanpa memasangnya kembali. Palui beralasan ia hanya melakukan sesuai permintaan, karena Garbus tidak meminta untuk memasangnya lagi. Setelah diberi penjelasan, Palui akhirnya memperbaiki sepeda motor itu hingga bisa menyala dengan baik. Garbus memuji keahlian Palui yang ternyata cukup bisa diandalkan meski baru belajar bengkel. Namun ketika Garbus mencoba motor tersebut, tercium bau bensin dan ternyata tangki bensinnya bocor. Ia panik dan berteriak “banjir!”, membuat istri Palui menyangka terjadi banjir sungguhan hingga ikut panik keluar rumah.

*****

SAMALAM Garbus tapakalah banar digawi Palui. Wayah garbus handak minta turunakan wan bungkarakan masin sapida muturnya karna ngalih banar hidupnya dan parlu dibaiki. Eee… sakalinya bujur-bujur dibungkar dan bahamburan alat-alatnya.

“Kukira ikam paham karna ikam montir sapida mutur, sakalinya hanya pintar mambongkar tapi kada mambulikakan,” ujar Garbus.

“Aku bagawi sasuai parmintaan ikam. Wayah itu ikam minta bongkarakan haja dan kadada bapadah minta pasangakan lagi, maka itulah nang kugawi,” ujar Palui.

“Kalu ikam bujur-bujur montir Lui ai pasti paham,” ujar Tulamak umpat malawanakan Garbus.

“Nah, karna ada parmintaan ikam supaya dipasangakan maka hadangi satangah jam pasti beres,” ujar Palui langsung manggawi.

Imbah tuntung manggawi mambaiki sapida mutur Garbus, lalu Palui baucap, “Nah, beres Bus ai, samunyaan sudah kubaiki, ayu cuba hidupi masinnya, pasti tukcer.”

“Hi’ih-lah, walaupun Palui montir hanyar dan digalari nyiur gumpa tanyata kada diragukan lagi kabisaannya,” ujar Garbus mamuji.

Wayah Garbus handak mancuba bakuliling-kuliling, inya mancium bau bensin, lalu inya turun matan sapida mutur langsung maitihi masinnya. “Eee.. Lui, Lui, banjir, banjiirrr…,” ujar Garbus bakuriak.

Mandangar suara kuriakan banjir, banjir maka bini Palui dalam rumah badadas ka luar sambil kukuriak jua, “Abahnyaaa… uuiii abahnya, lakasi putiki jamuran banih, lingkup tikarnya kaina kabasahan, ayu lakasiii….”

“Uiii… umanya, sabar umanya. Hari panas banar, kadada hujan, kadada guntur kadada hujan, kanapa maka pina takutan kabanjiran, takutan kaba’ahan,” ujar Palui mambisai bininya.

“Maka tadi kudangar ada urang kukuriak banjir… banjir…,” ujar bini Palui pina habang hirang muha takajut.

“Nang bakuriak banjir tadi adalah kawal kita si Garbus ini. Inya mambaiki sapida mutur, imbah dibaiki tadi lalu dicubanya. Sakalinya, kaciuman bau minyak bensin, eee… sakalinya tangki bensinnya bocor, lalu Garbus kukuriak, banjir, banjir. Nang banjir itu adalah minyak bensin sapida muturnya, lain sungai di subarang jalan itu nang ba’ah,” ujar Palui manarangakan wan bininya.

“Biar kadada hujan bisa haja banjir bakakajutan abahnya ai,” ujar bini Palui manjawab. emhati(repro)

Sumber: Banjarmasin Post Edisi Cetak, tanggal 5 April 2019

Garbus kesal karena Palui hanya membongkar mesin sepeda motornya tanpa memasangnya kembali. Palui beralasan ia hanya melakukan sesuai permintaan, karena Garbus tidak meminta untuk memasangnya lagi. Setelah diberi penjelasan, Palui…