Kesah Palui : Mamborong Kangkung

Palui berjalan tergesa ke pasar, membuat Garbus dan Tulamak heran melihat kesungguhannya. Ia mengatakan ada sesuatu yang sangat penting harus dibeli, bahkan jika tidak ditukar bisa menyebabkan kematian. Setelah sampai di pasar, Palui langsung mencari kangkung dan mencoba menawar harga dengan cara lucu dan berlebihan. Garbus dan Tulamak kebingungan, hingga akhirnya Palui menjelaskan bahwa kangkung itu untuk memberi makan karincinya yang sudah dua hari tidak makan. Tulamak pun tertawa karena ternyata di belakang rumahnya tumbuh banyak kangkung yang bisa diambil tanpa harus repot ke pasar.

*****

MATAN jauh talihat Palui pina mangincang bajalan ampah ka wadah Garbus wan Tulamak nang lagi badudukan di gardu runda. Taheran-hiran jua bubuhannya malihat

“Hakunlah bubuhan ikam manggani’i aku ka pasar karna ada nang kucari,” ujar Palui pina manggah.

“Handak mancari napa Lui maka panting banar?” ujar Tulamak.

“Nang kucari ini cukup panting, kada kawa ditunda-tunda lagi,” ujar Palui.

“Umpat batakunlah Lui, sabujurnya ikam ka pasar ini handak manukar napa?” ujar Garbus ma-anyaki.

“Pukuknya nang kutukar ini panting banar karna bila kada kutukar bisa mati,” ujar Palui.

“Napa bandanya Lui?” ujar Tulamak.

“Kaina haja kusambat, bubuhan ikam pasti tahu,” ujar Palui langsung mambawai bubuhannya tulakan ka pasar.

IMBAH sampai, bubuhannya bakuliling pasar manggani’i Palui mancari sesuatu nang balum mau disambatnya. Lalu sampailah bubuhannya di los pasar sasayuran.

“Barapa kangkung ini sakaranjang?” ujar Palui.

“Sakaranjang itu isinya 100 ikat haraganya Rp20 ribu. Tapi bila diborong hakun haja Rp15 ribu,” ujar panjual sayur.

“Gasan napa Lui ikam mamborong kangkung sakaranjangan?” ujar Garbus mambisiki Palui.

“Bila kada kutukar bisa bamatian Bus ai,” sahut Palui. Lalu inya batakun pulang wan panjual itu. “Kawalah kurang, Rp10 ribu haja, jadi saratus rupiah saikatnya,” ujar Palui lalu mangaluarakan duit lembaran Rp500. “Kalu sampiyan hakun, ulun manukar Rp500 haja, jadi dapat lima ikat,” ujar Palui.

“Dasar pamalar ikam ini Tuh ai, manawar haraga sakarajangan, ba-agak main borong sakalinya manukar lima ikat haja,” ujar panjual gagarunum manumpalak Palui.

Gasan napa kangkung itu Lui maka dipadahakan bila kada manukar bisa bamatian?” ujar Garbus hiran.

“Aku handak mambari makani karinciku, sudah dua hari kahabisan kangkung,” ujar Palui pina kada tahu manahu.

“Palui, Paluiii… bauyuh-uyuh kuliling pasar hanya mancari kangkung, di balakang rumahku satuyuk kangkung,” ujar Tulamak umpat manumpalak. emhati(repro)

Sumber: Banjarmasin Post Edisi Cetak, tanggal 25 April 2019

Palui berjalan tergesa ke pasar, membuat Garbus dan Tulamak heran melihat kesungguhannya. Ia mengatakan ada sesuatu yang sangat penting harus dibeli, bahkan jika tidak ditukar bisa menyebabkan kematian. Setelah sampai…