Kesah Palui : Pupudak wan Kalapon

Palui yang baru pulang dari pasar disapa Mahaji Limah yang sedang menjemur bantal dan tilam. Karena salah dengar, Palui mengira Mahaji bertanya “apa yang di bawah,” lalu menjawab dengan candaan bahwa yang di bawahnya adalah “pupudak satulur dan kalapon dua biji.” Mahaji Limah pun kaget dan latahnya kambuh, berteriak-teriak menyebut kata itu berulang kali hingga membuat heboh. Setelah sadar bahwa semua itu karena salah paham antara “dibawa” dan “di bawah,” Palui segera meminta maaf. Untung suami Mahaji datang menenangkan dan menyiramkan air hingga istrinya reda dari gigirannya.

*****

MAHAJI Limah nang bapanyakit latah alias kagigiran itu, sadang manjamur tilam wan bantal di halaman rumahnya. Pas tabarung si Palui liwat bulik matan pasar, imbah menukar buku tulis wan map surat. Maklum haja-ah, samingguan ini inya tapilih jadi katua RT.

Ui Palui, napa dibawa? mahaji Limah manyapa Palui.

Caaah….di bawah nang sudah jua. sahut Palui. Napa dibawa nang sudah sudah itu, Lui?

Kada lain pang, pupudak satulur, kalapon dua biji, sahut Palui bagamat.

Haw… kurang ajar ikam Lui, ikam porno. Kanapa ikam manyambat pakakas nang di dalam salawar. Aku kada batakun nitu muntung kurang ajar! ujar mahaji Limah.

Oo…. mahaji, tapaksa-ai milikku ini kubawa, karena kada kawa dititipkan ka urang lain, ujar Palui lihum.

Aku kada paduli milikmu itu, ujar mahaji Limah mulai sangit

Nang aku takunakan tadi, napa nang ikam bawa? Lagi sakali napa nang ikam bawa? ujar mahaji manciling-ciling.

Ooo…..kaya itukah mahaji? Tadi pandangaranku napa nang di bawah. Amun takunan napa nang di bawah, kada lain jawabnya ialah pupudak satulur, wan kalapon dua biji, nang di dalam salawar ini….ha,ha, ha,ha haha!

Sigap mahaji Limah tatawa jua, langsung latah, kagigiran: Ih pupudak….ih kalalapon. ih pupudak….ih kalalapon, ih kalalapon… ih pupudak, ih satulur….ih dua…. iah dua talu biji.

Astaga…. bazikir mahaji satop mahaji, satop manyambat pupudak wan kalalapon.

Capat Palui manyurung tangan maminta maaf karana salah pandangar. Apa nang dibawa, bukan apa nang di bawah.

Kalu pandangaran ulun sampurna, pasti ulun jawab mambawa buku tulis wan map surat surat. Tapi talinga ulun kada sampurna lagi. Sahingga nang di bawah disambat pupudak wan kalalapon.

Ih…ih…. pupudak, ujar mahaji kumat pulang gigirannya. Sudah bazikir pitung kali, balum jua ampih sampai sidin bapaluh dingin.

Akhirnya laki sidin kaluar ka palataran membawakan banyu dalam baskom. Mahaji Limah ditampungasi sidin sambil mambaca isim-isim wan doa. Alhamdulillah, mahaji sadar dan ampih gigirannya.

Palui manyurung tangan ka pak haji laki mahaji Limah, maminta maaf karena tasalah pandangar, antara nang dibawa lawan nang di bawah. (rep/aan)

Sumber: Banjarmasin Post Edisi Cetak, tanggal 26 April 2019

Palui yang baru pulang dari pasar disapa Mahaji Limah yang sedang menjemur bantal dan tilam. Karena salah dengar, Palui mengira Mahaji bertanya “apa yang di bawah,” lalu menjawab dengan candaan…