Kesah Palui : Bahaharatan Kayi
- 40 kali
Menjelang waktu berbuka puasa, Palui dan teman-temannya berbincang di gardu dekat masjid tentang kehebatan para kakek mereka. Tulamak bangga karena kakeknya mampu mengusir buaya, Tuhalus bercerita bahwa kakeknya memindahkan sarang singa, sedangkan Garbus mengaku kakeknya bisa menangkap ular sebesar pohon kelapa. Palui, yang awalnya tampak rendah hati, kemudian juga menceritakan bahwa kakeknya seorang pemberani yang pernah memburu buaya, singa, dan ular besar di hutan. Ia bahkan membuktikan dengan menunjukkan sabuk dari kulit ular, sepatu dari kulit buaya, dan kopiah dari rambut singa, membuat teman-temannya tercengang dan terpingkal.
*****
SAMBIL mahadang dauh babuka puasa bubuhan Palui sapakawalan badudukan di gardu parak masigit. Napa haja dipanderakan, ka hulu ka hilir matan sual bibinian sampai mamader pakayian.
“Sakadar bubuhan ikam katahui haja bahwa dahulunya sungai di wadah kita banyak buhayanya. Tapi wayahini sudah kadada lagi karna dihalau kayiku ka hulu,” ujar Tulamak manunjuk ka sungai.
“Jadi kalu kaya itu kayi Tulamak itu jagu banar kawa mamburu buhaya,” ujar Palui mamuji kayi Tulamak.
“Kalu kaya itu sama wan kayiku,” sahut Tuhalus, “Karna sidin bajasa banar mamindah sarang singa nang galak-galak ka pahuluan mungkin parak wan sarang buhaya kayinya Tulamak,” ujar Tuhalus.
“Kalu sual bahaharatan kukira kada kalah wan arwah kayiku,” ujar Garbus manyambung, “Karna sidin kawa manangkap ular nang ganalnya kaya batang nyiur lalu manyuruh bajauh supaya jangan mangganggu anak cucu,” ujar Garbus.
“Bujur harat bubuhan kayi-kayi bahari, kayi Tulamak manyuruh buhaya pindah, kayi Tuhalus manyuruh singa pindah ka hulu wan kayi Garbus wani manangkap ular ganal,” ujar Palui.
“Lalu napa kaharatan kayi ikam Lui?” ujar Garbus.
“Kayiku kada kalihatan kaharatannya karna sidin alim, palihum, katuju manulung urang tapi sidin kada kawa dihuhulut atawa dianggap inting,” ujar Palui randah hati.
“Mungkin ada jua kajian sidin maklum urang bahari pasti ada baisian kajian,” ujar Tulamak.
“Kayiku itu pamadam banar, wayah dahulu itu sidin tulak ka hutan di hulu atawa ka gunung-gunung, banyak manamui halangan wan tantangan. Di antaranya sidin bakisah biasa manangkap buhaya ganal banar lalu disumbalih sidin wan dagingnya dibanam. Kaya itu jua sidin biasa handak banar mamakan daging singa, lalu pas badapat di gunung langsung ditangkap sidin wan dimakan mantah-mantah. Kada cuma itu karna dalam pamadaman sidin itu biasa jua batamu ular ganal banar kaya batang nyiur lalu ditangkap, ditatak-tatak wan dihiris sidin langsung kulitnya diulah tas wan ikat pinggang lalakian,” ujar Palui taliur-liur mangisahakan kayinya.
“Mungkin binatang nang ditangkap wan dibunuh kayiku itu adalah binatang nang diburu ulih bubuhan kayi ikam,” ujar Palui lihum.
“Napa buktinya Lui, kaharatan kayi ikam itu,” ujar Garbus.
“Ini nah buktinya ikat pinggangku kulit ular, sapatuku bahannya kulit buhaya wan kupiahku ini rambut singa,” ujar Palui baagak mangalahakan kisah kayi-kayi bubuhannya. (banjarmasinpost.co.id/emhati/repro)
Sumber: Banjarmasin Post Edisi Cetak, tanggal 12 Mei 2019
Menjelang waktu berbuka puasa, Palui dan teman-temannya berbincang di gardu dekat masjid tentang kehebatan para kakek mereka. Tulamak bangga karena kakeknya mampu mengusir buaya, Tuhalus bercerita bahwa kakeknya memindahkan sarang…
