Kesah Palui : Bunyi Sirene

Palui dikenal sebagai orang yang tidak konsisten berpuasa. Baru setengah hari, ia sudah menyerah dan makan di warung. Suatu hari, teman-temannya membicarakan kebiasaan Palui yang sering membatalkan puasa lebih awal. Ternyata, saat buka puasa bersama di rumah Tulamak, Palui sudah makan sebelum waktu magrib karena mendengar bunyi sirene. Ketika ditanya, Palui membela diri dengan alasan mengikuti anjuran “percepatlah berbuka.” Namun, Tulamak menjelaskan bahwa suara itu bukan tanda waktu berbuka, melainkan sirene ambulans yang mengantar jenazah. Tanpa rasa bersalah, Palui malah menyalahkan sopir ambulans dan almarhum karena membuatnya batal puasa.

*****

PALUI tamasuk urang nang kada tapi pamuasa alias balang kambingan, sahari inya bapuasa, dua talu hari inya parai. Tapi puasanya nang balang kambingan itupun kada sampai saharian jua karna rancak pacah tangah hari di warung sakadup, maklum Palui itu tamasuk jagau makan. Karna sabalum puasa biasanya satiap tiga atawa ampat jam sakali inya makan.

Rupanya kalakuan Palui nang kada tapi pamuasa itu sudah tadangar ulih kakawalannya.

“Bujur nah Bus, Samalam wayah kami saru basalamatan buka puasa bersama, balum babunyi dauh sudah kicap-kicap muntungnya mauntal kurma” ujar Tulamak mangisahakan kalakuan Palui.

“Kanapa maka inya buka badahulu Mak ?” ujar Garbus.

“Kami takuni kanapa maka inya buka badahulu, inya mangarasi bahwa waktunya sudah sampai karna inya mandangar bunyi sirene,” ujar Tulamak bakisah. “Naahhh…….., itu si Paluinya bajalan ampah ka sini, cuba ikam takuni saurang,” ujar Tulamak manyuruh.

“Kanapa maka samalam wayah saruan di rumah Tulamak ikam buka badahulu Lui ?” ujar Garbus batakun.

“Ujar tuan guru ada dalilnya Bus ai, perlambatlah basahur dan percepatlah babuka, makanya samalam wayah aku mandangar bunyi sirene langsung haja kubaca Allahuma la kasumtu………,” ujar Palui manjawab.

“Tapi wayah itu hari hanyar pukul anam, padahal dauh gasan babuka mustinya parak pukul satangah tujuh,” ujar Tulamak.

“Buktinya sirene sudah babunyi maka langsung haja aku mamakan kurma itu,” sahut Palui.

“Di wadah kami ini kada badasar bunyi sirene tapi mahadang bunyi dauh,” ujar Tulamak.

“Lalu bunyi sirene samalam itu tanda gasan napa?” ujar Palui batakun.

“Bunyi samalam itu lain bunyi sirene Lui ai, tapi bunyi mubil ambulan nang ma-antar mayat julak Tambi karna sidin mati di rumah sakit,” ujar Tulamak manjalasakan.

“Kalu kaya itu kada salahku tapi salah ambulan, makanya supir ambulan dan almarhum julak Tambilah nang mananggung dosaku,” sahut Palui kada hakun bakalah. emhati (repro)

Sumber: Banjarmasin Post Edisi Cetak, tanggal 15 Mei 2019

Palui dikenal sebagai orang yang tidak konsisten berpuasa. Baru setengah hari, ia sudah menyerah dan makan di warung. Suatu hari, teman-temannya membicarakan kebiasaan Palui yang sering membatalkan puasa lebih awal.…