Kesah Palui : Kanangan Bahari

Saat bulan puasa, Palui dan kawan-kawannya tetap bersemangat mencari rezeki sambil mengenang masa muda mereka saat ikut garakan sahur. Palui teringat kejadian lucu tapi menyakitkan ketika Garbus terkena siraman air panas dari julak Duraba gara-gara ulahnya yang memukul seng rumah orang. Waktu itu, Duraba marah mendengar bunyi berisik dan menyiram air panas dari jendela, tapi malah mengenai Garbus yang kebetulan lewat. Meskipun sudah lama berlalu, bekas luka itu masih ada. Palui meminta maaf lagi sambil tertawa mengenang kenakalan masa lalu yang kini jadi kenangan lucu di bulan puasa.

*****

BIAR puasa kaya ini Palui wan kakawalannya tatap haja basamangat bacari razaki. Bedanya kabiasaan sungsung batajak di pangkalan, ni pina tasiang sadikit. Napa mun limbah basahur bubuhannya umpat malandau jua. Takana hari itu pina tarikan sunyi, bubuhannya asik bakisahan kalakuan lagi bahari salawas bulan puasa.

“Aku jadi kaingatan kalakuan kita bahari waktu bagarakan sahur,” ujar Palui lihum.

“Kaingatan napa Lui, kanapa jadi ikam pina lihum ka aku,” ujar Garbus kada nyaman.

“Cuba pang ikam itihi tangan ikam bus, masih lah bakunat bakas kana banyu panas?” Lalu Garbus maitihi ka tangannya nang sabalah kiri.

“Ha-ha…aku ingat Lui ai, itu kajadian nang paling manyakitkan sapanjang hidup garbus. Gara-gara bagarakan sahur, tangannya disimbur julak Duraba lawan banyu panas, sampai wayahini kunatnya kada hilang,” ujar Tulamak lucut tatawa limbah ingat bahari.

“Sabujurnya ini akibat kalakuan Palui, aku nang kana gatahnya,” ujar Garbus kasasarikan.

“Aku minta maaf bus lah. Sudah saban bulan puasa aku minta maaf kalu?” ujar Palui.

“Bubuhan ikam jua nang maingatakan kunat ku ini,” ujar Garbus.

“Kanapa maka ikam manyalahakan Palui?” ujar Tulamak kada tahu kisahnya.

“Waktu kita bagarakan sahur bahari, kita katuju kalu masuk gang kaluar gang?

Nah, bila liwat gang julak Duraba, seng rumah sidin tu digadur Palui lawan tangan, maka nyaring pulang. Rupanya julak Duraba sarik mandangar sengnya dipukul-pukul, lalu disimbur sidin matan lalungkang pakai banyu panas. Tabarungan aku nang pandudian bajalan, lalu kana aku. Makanya aku nang luyuh kana banyu panas,” ujar Garbus pina sadih.

“Ikam jua katuju balambat-lambat, kami limbah manggadur seng sidin, langsung garabakan bukahan,” ujar Palui kaingatan kalakuannya bahari.

“Iya am katuju mahual urang, aku nang kapuhunan,” ujar Garbus sangkal.

“Kada papa Bus ai, masih jauh jua lawan jantung,” ujarnya manggamati Garbus.

“Itu kanang-kanangan bagarakan sahur kita bahari, mun kada kaya itu, bisa kadada sajarahnya, bujur kada?” ujar Palui manambahi.

“Bujur ai Lui ai, kada kawa babulik jua kisahnya ka wayah ini,” ujar Garbus masam. (banjarmasinpost.co.id/rep/fai)

Sumber: Banjarmasin Post Edisi Cetak, tanggal 22 Mei 2019

Saat bulan puasa, Palui dan kawan-kawannya tetap bersemangat mencari rezeki sambil mengenang masa muda mereka saat ikut garakan sahur. Palui teringat kejadian lucu tapi menyakitkan ketika Garbus terkena siraman air…