Kesah Palui : Manutuk Banih

Kesah Palui : Manutuk Banih

Setelah tarawih dan tadarus, Palui pulang ke rumah lalu bersiap tidur. Namun, istrinya menegurnya karena mendengar Palui tadi duduk di warung saat puasa. Palui membela diri, katanya hanya menemani teman tanpa makan atau minum, hanya “baruku” sedikit. Istrinya menegaskan bahwa itu tetap membatalkan puasa. Saat Palui hendak tidur, istrinya bilang mereka mungkin tak bisa sahur karena beras habis. Hanya ada benih padi yang belum ditumbuk. Istrinya menyindir, jika Palui ingin puasa, ia harus menumbuk padi malam itu juga. Dengan terpaksa dan mengantuk, Palui akhirnya manutuk padi demi bisa sahur.

*****

IMBAH tuntung sambahyang tarawih wan batadarusan di masigit, Palui langsung bulik ka rumah. Imbah babasuh batis lalu inya bapuat ka atas ranjang.

“Ui abahnya kawalah isuk sampiyan puasa?” ujar bini Palui managur lakinya.

“Kanapa maka ading batakun kaya itu, apakah ikam kada parcaya wan aku,” sahut Palui.

“Ulun dangar sampiyan rancak banar bapapanderan tentang warung sakadup,” ujar bini Palui.

“Kami sahibar mamander haja wayah bajalanan ka pasar wan kakawalan,” ujar Palui.

“Justru kakawalan sampiyan nang mamadahakan bahwa sampiyan sawat jua umpat duduk,” gasak bininya.

“Aku sahibar manggani-i haja, duduk dihiganya tapi kada umpat makan atawa nginum. Paling-paling baruku,” ujar Palui manyahut kada sadar.

“Baruku itu tamasuk mambatalakan puasa,” ujar bini Palui.

“Tapi……… tapi rukuknya kada ba-api karna kadada baisian korek api,” sahut Palui tapakalah.

“Ayu ja, ulun parcaya haja wan sampiyan. Tapi isuk kamungkinan kita kada kawa puasaan,” ujar bininya.

“Hau kanapa maka kada kawa puasaan. Padahal tadi ading baucap mambawai puasa. Napa sababnya?” ujar Palui.

“Bisa haja puasa tapi harus balapar,” sahut bininya.

“Musti haja bila puasa pasti balapar,” ujar Palui manggayai karna inya kada parcaya ucapan bininya itu.

“Kita tapaksa balapar kada makan sahur karna kadada baisian baras gasan bamasak, ulun kira tadi masih ada haja sisa samalam tapi nyatanya sudah habis,” ujar bininya.

“Hari sudah tangah malam ini kamana bahutang dan warung-warung sudah tutupan,” ujar Palui pina marista.

“Baras kita sudah kada baisian lagi, tapi banihnya masih banyak haja abahnya ai,” ujar bininya.

“Banih kada kawa di masak dan kada kawa dimakan umanya ai,” ujar Palui.

“Kawa ai dimasak dan dimakan, tapi……… harus ditutuk dahulu,” ujar bininya.

“Jadi maksud ading manyuruh aku manutuk banih-banih itu tangah malam ini jua,” ujar Palui manakuni bininya.

“Ayu ja pikirakan sampiyan masak-masak, bila handak puasa isuk maka sampiyan harus manutuk banih itu malam ini jua tapi bila handak baparai puasa, baiklah kita guringan haja kada usah basahur,” ujar bininya manyindir.

Tapaksa Palui ma-angkat kampil mambawa kabalakang handak manutuk banih gasan bamasak sahur.

“Manutuknya kada usah sakampilan abahnya ai, cukup gasan sapamasak haja” ujar bininya pina marayu.

“Nasib………nasib,” ujar Palui gagarunum sambil matanya kijip-kijip karna mangantuk. emhati(repro)

Sumber: Banjarmasin Post Edisi Cetak, tanggal 23 Mei 2019

 

Setelah tarawih dan tadarus, Palui pulang ke rumah lalu bersiap tidur. Namun, istrinya menegurnya karena mendengar Palui tadi duduk di warung saat puasa. Palui membela diri, katanya hanya menemani teman…

Tinggalkan Balasan

Alamat email Anda tidak akan dipublikasikan. Ruas yang wajib ditandai *