Kesah Palui : 4 Sihat 5 Balum Sampurna

Kesah Palui : 4 Sihat 5 Balum Sampurna

Dalam suasana bulan puasa, Garbus dan Tulamak berbincang tentang pentingnya pola makan “empat sehat lima sempurna”. Mereka berpendapat bahwa konsep itu sulit diterapkan bagi orang miskin karena keterbatasan ekonomi. Palui yang mendengarkan kemudian menambahkan pandangannya bahwa meskipun pola makan itu baik, tetap belum sempurna jika tidak disertai unsur halal. Menurutnya, makanan bukan hanya harus bergizi, tetapi juga harus bersih, halal, dan diridhai oleh Tuhan. Ia menegaskan bahwa keberkahan hidup tidak hanya datang dari nutrisi jasmani, tetapi juga dari kesucian dan kehalalan rezeki yang dikonsumsi.

*****

BIAR bulan puasa bubuhannya tatap haja tulak bagawian maujek, karna bila sahari kada manarik maka sahari jua dapur kada bakukus. Siang itu sambil mahadang tarikan, Garbus wan Tulamak badudukan di gardu runda sambil ulir-ulir ba-rabahan.

Ampat sihat lima sampurna, ampat sihat lima sampurna, ujar Garbus gagarunum.

Ikam ma-amang napa Bus maka pina gagarunum maranyau, kaya urang kapanasan atau garing panas, ujar Tulamak.

Aku kaingatan palajaran kasihatan Mak ai. Bila awak handak sihat maka turutilah makanan ampat sihat lima sampurna, ujar Garbus.

Nyaman disambat tapi ngalih dituruti bila kada baduit, makanya ampat sihat lima sampurna itu kada gasan kita nang miskin ini, ujar Tulamak.

Walaupun kada gasan kita, tapi nyatanya awak ikam makin balamak tarus. Artinya, makanan ikam cukup ampat sihat lima sampurna, ujar Garbus.

Ampat sihat lima sampurna, sabujurnya balum sampurna jua makanya parlu disampurnakan, ujar Palui mangomentari panderan Garbus wan Tulamak.

Napa alasan ikam baucap kaya itu Lui, itu sama artinya ikam kada katuju wan anjuran kasihatan pamarintah, ujar Garbus.

Jangan didangarakan ucapan Palui itu Bus ai, buktinya inya kada mamakai 4 sihat wan 5 sampurna itu maka awaknya kurus karing, ujar Tulamak.

Ampun maaf haja Mak ai, aku sabujurnya kada manyalahakan 4 sih wan 5 sam itu. Tapi kupadahakan balum sampurna makanya parlu disampurnakan, ujar Palui manyingkatnya pina banahap.

Ikam itu tamatan sakulah pesantren makanya kada tahu sual kasihatan, ulih karna itu jangan mahapak pandapat urang pintar nang sakulah kasihatan, ujar Garbus.

Aku kada mamahapak atawa manyalahakan pandapat urang kasihatan itu Bus ai tapi justru handak malangkapi wan labih manyampurnakannya karna aku urang pesantren, ujar Palui.

Aku sapandapat wan Garbus bahwa di pesantren itu kada dikaji sual kasihatan, makanya sarahkanlah wan ahlinya, ujar Tulamak malawanakan Garbus.

Karna bubuhan ikam cuma maumpati 4 sih wan 5 sam makanya kurang babarkat. Banyak bukti bahwa bubuhan pajabat kita maumpati jua 4 sih wan 5 sam ini, makanya kada babarakat apalagi asal usul makanan itu kada jalas datangnya, ujar Palui lihum.

Jadi kaya apa supaya babarakat Lui? ujar Garbus.

Naahhhh… di sinilah pentingnya parananku sebagai urang pesantren. Makanan itu memang harus 4 sihat wan 5 sampurna tapi harus ada unsur nang ka-anam. Unsur nang ka-anam itu adalah halal.

Makanya, rumusnya babunyi: Ampat sihat lima sampurna wan anam halal. Karna satiap nang halal pasti diredhai ulih Tuhan, ujar Palui mamacahakan kuncinya. (rep/tam)

Sumber: Banjarmasin Post Edisi Cetak, tanggal 1 Juni 2019

Dalam suasana bulan puasa, Garbus dan Tulamak berbincang tentang pentingnya pola makan “empat sehat lima sempurna”. Mereka berpendapat bahwa konsep itu sulit diterapkan bagi orang miskin karena keterbatasan ekonomi. Palui…

Tinggalkan Balasan

Alamat email Anda tidak akan dipublikasikan. Ruas yang wajib ditandai *