Kesah Palui : Umpat Bafitrah

Menjelang hari raya, Palui mengajak Garbus untuk merayakan secara sederhana dan tidak berlebihan. Ia mengingatkan bahwa hari raya seharusnya menjadi momen untuk bersyukur dan peduli kepada fakir miskin, bukan ajang bermegah-megahan. Garbus sepakat, lalu mereka membahas pentingnya zakat fitrah sebagai bentuk kepedulian sosial dan penyempurna ibadah puasa. Saat menentukan besaran zakat, Palui dengan jenaka menghitungnya berdasarkan campuran harga beras biasa dan raskin agar adil. Meskipun perhitungannya unik, niatnya tulus ingin menunaikan kewajiban. Bagi Palui, yang penting bukan besar kecilnya zakat, tetapi keikhlasan dalam berbagi.

*****

BIASANYA parak hari raya ini pasti ada nang lain dari biasanya. Umpamanya baulah makanan has banua, lapat, katupat, lamang, hintalu, tapai, apam.

“Tahun ini kami saparanakan tapaksa bakaring, artinya bahari raya ini kada gasan baagak, bacakah wan basombong-sombong. Lihatlah bubuhan warga kita nang miskin, yatim piatu, talantar nang makan cuma kawa sakali sahari,” ujar Palui.

“Aku akur banar pandapat ikam itu Lui ai, jadi rayakanlah hari raya ini sasadarhana mungkin,” ujar Garbus.

“Agama kita sudah maajarakan bahwa pada hari raya ini justru kita labih manyadarkan diri karna hanyar lulus ujian puasa sabulanan. Diri kita putih barasih kaya bayi nang hanyar diranakakan, makanya dijaga jangan sampai dirigati lagi wan nang dilarang agama, tamasuk cakah, sombong itu,” ujar Palui.

“Tamasuk malaksanakan kawajiban mambayar zakat fitrah,” ujar Garbus manambahi pandiran Palui.

“Pas banar ujar ikam itu Bus ai, karna dari zakat fitrah itulah hasilnya dibagiakan kasan dalapan pihak nang barhak manarimanya. Cuntuhnya para fakir miskin, yatim piatu wan para dhuafa lainnya,” ujar Palui.

“Ikam Lui umpat jualah bazakat fitrah?” ujar Garbus.

“Aku bafitrah haja Bus ai, karna kadada harta yang dizakati,” ujar Palui.

“Syukur jua kita kawa malaksanakan Rukun Islam mambayar fitrah,” ujar Garbus.

“Tahun ini barapa ganalnya fitrah awak Bus?” ujar Palui.

“Ganalnya fitrah sasuai wan baras pamakan kita, nang biasanya makan baras unus Rp 9.500, baras siam/karangdukuh Rp 8.500, baras biasa Rp 7000, baras dolog Rp 4.500,” ujar Garbus sambil mambaca tulisan di surat kabar.

“Kalu kaya itu aku bafitrah Rp 6.500 haja” ujar Palui.“

Hau, kanapa maka Rp 6.500. Kadada dalam daftar nang anam ribu rupiah Lui ai?” ujar Garbus.

“Sabujurnya pamakanku kada manantu, bahanu baras biasa, bahanu karang dukuh, tapi tarancaki baras raskin.

Makanya kugabung haja kaduanya, lalu kuambil tangah-tangahnya. Rp 8.500, ditambah Rp 4.500 = Rp 13.000, lalu dibagi dua supaya adil,” ujar Palui.

“Tasarah ikam haja Lui ai, tapi nang panting jangan katinggalan bafitrah,” ujar Garbus. (banjarmasinpost.co,.id/rep/tam)

Sumber: Banjarmasin Post Edisi Cetak, tanggal 2 Juni 2019

Menjelang hari raya, Palui mengajak Garbus untuk merayakan secara sederhana dan tidak berlebihan. Ia mengingatkan bahwa hari raya seharusnya menjadi momen untuk bersyukur dan peduli kepada fakir miskin, bukan ajang…