Kesah Palui : Pamalsuan

Menjelang hari raya, Palui menasihati Garbus dan Tulamak agar tidak berlebihan membeli baju baru atau makanan, sebab masih banyak orang miskin yang kesulitan memenuhi kebutuhan sehari-hari. Ia mengingatkan agar sebagian rezeki disisihkan untuk membantu yatim piatu dan fakir miskin. Obrolan mereka kemudian beralih ke soal pemalsuan. Tulamak berpendapat pemalsuan sama dengan penipuan yang harus dihukum, namun Palui menimpali bahwa tidak semua pemalsuan ditindak jika tidak ketahuan. Akhirnya, Palui bercanda bahwa ada pemalsuan yang tetap aman seperti tukang kunci palsu dan pembuat gigi palsu, membuat mereka semua tertawa terbahak-bahak.

*****

“WAYAH hari raya pasti banyak urang nang bahimat batutukar baju salawar di samping macam-macam wadai,” ujar Palui mambuka panderan.

“Sabujurnya bulih haja urang batutukar macam-macam jangan dihirii,” ujar Garbus manyahuti.

“Aku kada hiri Bus ai tapi ingatlah masih banyak warga kita nang miskin kasihan bubuhannya di hari raya ini jangankan manukar baju salawar gasan makan hari-hari haja harus balangsar dada,” ujar Palui.

“Ooooo… jadi maksud ikam jangan ba-agak, jangan cakah karna mantang-mantang baduit lalu main borong,” ujar Garbus.

“Maksudku, sisihakan sabagian duit gasan batutukar itu lalu sumbangakan wan anak yatim, fakir miskin, panti asuhan wan bubuhan duafa,” ujar Palui.

“Bubuhan nang sugih-sugih itu sudah jua bafitrah wan bazakat,” ujar Garbus.

“Kalu sudah bazakat mal baik haja tapi jangan talalu manyuluk banar bila batutukar, mubazir,” ujar Palui.

“Aku paham haja Lui ai, sasuai anjuran pamarintah baulanjalah saparlunya wan bapikirlah masak-masak kagunaannya sabalum manukar supaya kada mubazir,” ujar Garbus.

“Umai haratnya ikam Bus, pina bisa banar bapander kaya iklan di tivi,” ujar Tulamak umpat manyala pander.

“Aku akur banar Bus ai, tapi pikirakan jua supaya kita jangan tatukar barang palsu,” ujar Palui.

“Pamalsuan ba-arti panipuan, Karna panipuan maka harus ditindak wan dihukum,” ujar Tulamak.

“Tapi kada satiap pamalsuan harus dihukum,” ujar Palui mambalas panderan Tulamak.

“Ada pasal-pasalnya Lui ai, mamalsu baarti manipu,” ujar Tulamak kada hakun kalah.

“Pamalsuan itu hanya bisa ditindak atawa bisa dihukum hanya bila katahuan, tapi bila kada katahuan maka amanlah pamalsunya,” ujar Garbus.

“Tapi ada jua pamalsuan, biar katahuan atawa kada katahuan tatap aman wan kada kawa ditindak,” ujar Palui.

“Itu tamasuk KKN,” ujar Tulamak singkat. “Kada mungkin, pasti ditindak,” ujar Garbus.

“Buktinya, itu… tukang ulah kunci palsu kada ditindak, itu… tukang gigi nang maulah gigi palsu kada ditindak wan kada dihukum,” ujar Palui mangalakak tatawa sampai maluncat gigi palsunya.

“Tarus tarang haja kami mangaku kalah Lui ai karna ikam bujur-bujur mambuktiakan kapalsuan ikam,” ujar Garbus wan Tulamak. (rep/tam)

Sumber: Banjarmasin Post Edisi Cetak, tanggal 8 Juni 2019

Menjelang hari raya, Palui menasihati Garbus dan Tulamak agar tidak berlebihan membeli baju baru atau makanan, sebab masih banyak orang miskin yang kesulitan memenuhi kebutuhan sehari-hari. Ia mengingatkan agar sebagian…