Kesah Palui : Sakilu Ampat

Kesah Palui : Sakilu Ampat

Palui sangat senang memancing papuyu di musim kemarau hingga menjadi kebiasaannya setiap hari. Ia bercerita kepada Garbus dan Tulamak bahwa hasil tangkapannya besar, sampai bisa mendapatkan empat ekor seberat satu kilogram. Tergiur dengan cerita itu, Garbus dan Tulamak pun ikut memancing bersamanya. Namun setelah berjam-jam, mereka hanya mendapat ikan kecil dan merasa tertipu. Ketika ditanya maksudnya, Palui menjelaskan bahwa “sakilu ampat” bukan berarti empat ekor seberat satu kilogram, melainkan berjalan sejauh satu kilometer baru dapat empat ekor. Garbus dan Tulamak pun marah, sementara Palui hanya tertawa terbahak-bahak.

*****

Wayah banyu di pahumaan mulai karing Palui katuju banar maunjun papuyu. Saban hari gawiannya maunjun papuyu haja. Bilang handak kada ingat lagi kakawalannya.

Biasanya, imbah tangah hari inya sudah basiap handak tulak maunjun. Kanapakah wayahini Palui bilang kamaruk banar baunjun. Padahal kulihan iwaknya gin kada tapi banyak jua.

“Nangapa kisahnya ikam wahini Lui bilang katuju banar baunjunan? ujar Tulamak batakun wan kawalnya ngitu.

Nang ditakuni pina lihum-lihum haja. “Bubuhan ikam kada tahu banar ai, jaka maumpati aku baunjun pasti handak batarusan jua baunjun hari-hari,” ujar Palui manyahuti.

“Nang kaya apa garang iwak papuyunya nang ikam dapat? Ganal jua kah Lui,” ujar Garbus umpat batakun jua.

Tuhirang nang dasar kada katuju wan kada bisa maunjun pina kulir-kulir mendangari. Tuhiran baparinsip mudal gasan maunjun tu baik ditukarakan iwak ka pasar, nyata hasilnya.

“Amun ganal banar tu kada jua pang, tagal silih haja tuh hasilnya. Amun sakilu ampat ada pang papuyunya,” ujar Palui sambil malikit ruku, pina tahiring-hiring ha kapala maagaki kakawalannya di warung tu.

Mandangar sakilu ampat, Garbus nang katuju barikinan langsung pina tabunciling matanya. “Bah, ganal amun sakilu ampat ikung tu. Sama kaya iwak nila nang dijual di pasar. Sakilu ampat tu amun saikungnya ada ai taganal pada tabahanku ini,” ujar Garbus sambil manating talapak tangannya.

“Bujur tu. Amun sakilu ampat pas banar kaya talapak tangan ganalnya. Ngitu ngarannya papuyu tabahan, nyaman banar diubar,” ujar Tulamak manyahuti.

Isuknya, balum jam dua tangah hari Garbus wan Tulamak sudah baganaan di rumah Palui, handak umpat maunjunan. Tantaran, imbir gasan wadah iwak, wan umpan sudah siap. Batiga bakawan tu tulakan ka pahumaan, maunjun di susungaian panjang atawa karukan nang ujar Palui banyak iwaknya.

Parak mandua jam maunjun Batiga bakawal tu kada takulih jua papuyu tabahan. Bapal-pal jalan, nang dapat paling ganalnya kaya ibu jari, itu gin talu ikung haja. Sampai parak magrib kada kulihan jua papuyu nang ganal.

“Hau, mana Lui tabahannya? Mana ujar ikam nang sakilu ampat ikung tu?” ujar Garbus batakun rahat manuju bulikan. Tulamak gin umpat jua gagarunum manyambati Palui pangaramput.

“Aku kada bakaramput. Bubuhan ikam nang salah maartikan. Maksudku sakilu ampat tu kadanya ampat ikung sampai sakilu pang barat iwaknya. Maksudku, rahat maunjun tu kita bajalan sakilu kulihan ampat ikung papuyu,” ujar Palui sambil kada tahu-tahu muhanya.
Habang kalas muha Garbus wan Tulamak rahat mandangar Palui baucap. Dalam hatinya rasa bujur jua pang Palui tu.

Di tangah jalan, buhannya tasampuk wan Tuhirang nang handak ka langgar. “Kayapa? Ganal-ganallah papuyunya? Ada nang kaya sandallah ganalnya? Minta pang Mak,” ujar Tuhirang.

“Nah, ambil nah!” ujar Tulamak sambil mahamputakan sandal nang dipuruknya. Malipak sandal Tulamak ka muha Tuhirang. Tuhirang bingung, kada tahu salah napa jadi buhannya sarik wan inya.

Palui mangalakak tatawa sing nyaringan sambil hancap bajalan maninggalakan Tulamak wan Garbus nang kasasarikan. (rep/ofy)

Sumber: Banjarmasin Post Edisi Cetak,tanggal 11 Juni 2019

Palui sangat senang memancing papuyu di musim kemarau hingga menjadi kebiasaannya setiap hari. Ia bercerita kepada Garbus dan Tulamak bahwa hasil tangkapannya besar, sampai bisa mendapatkan empat ekor seberat satu…

Tinggalkan Balasan

Alamat email Anda tidak akan dipublikasikan. Ruas yang wajib ditandai *