Kesah Palui : Kada Biasa Hilang

Warga kampung Palui bergembira saat listrik akhirnya masuk ke desa mereka. Semua antusias membicarakan hal itu, termasuk Palui, Garbus, dan Tulamak. Palui bahkan menawarkan rumahnya sebagai contoh pertama pemasangan listrik. Saat petugas PLN bekerja, warga ramai menonton tanda kemajuan kampung mereka. Petugas mengingatkan agar hemat memakai listrik, sementara Tulamak berencana membeli televisi secara kredit. Rasa penasaran muncul ketika Palui menanyakan siapa penemu listrik, namun petugas PLN bingung menjawab, hanya mengatakan listrik tak akan hilang kecuali dicabut lagi. Semua tertawa, menikmati momen lucu sekaligus bersejarah bagi kampung mereka.

*****

IMBAH lawas mahadang ahirnya kampung Palui dimasuki ulih listrik jua. Himung sabarataan warga mandangar karna kada cagar kadap lagi kampung. Samingguan ini nang dipandirakan pasti masalah listrik nang handak masuk itu haja.

“Ujar pambakal ada habar baik bahwa di wadah kita ini cagar ada listrik masuk desa,” ujar Garbus.

“Hi’ih bujuran Mak ai, aku mandangar jua bahwa kada lawas lagi rumah-rumah kita cagar balistrik,” ujar Palui manambahi panderan Garbus.

“Pasti larang biaya mamasangnya,” ujar Tulamak.

“Biayanya ringan haja dan kawa dicicil. Nah itu bubuhan PLN sudah mulai maukur gasan mamasang tihangnya,” ujar Palui.

“Kalu kaya itu kada lawas lagi pasti cagar dipasang di rumah kita,” ujar Garbus.

“Pamasangan listrik dimulai di rumahku, ayu datangi Mak, datangi Bus supaya kawa dijadiakan cuntuh,” ujar Palui mamabawai.

Wayah pamasangan tali dan alat-alat listriknya di rumah Palui banyak warga nang manyaksiakan sebagai tanda kasukaan bahwa kampungnya cagar tarang.

“Walaupun sudah balistrik tapi pakailah seperlunya haja, supaya hemat pambayarannya,” ujar patugas PLN.

“Kalu sudah ada aliran listrik ini kawa manukar tivi,” ujar Tulamak pina ba-agak.

“Manukarkah atawa mangariditkah Mak?” balas Palui manyindir.

“Maksudku manukar tapi dengan cara mangaridit,” sahut Tulamak.

“Ui patugas PLN, umpat batakunlah?” ujar Palui.

“Ayu ja napa nang ditakunakan Lui asal kada jauh wan gawian kami,” sahut patugas PLN.

“Manurut sampiyan siapa nang manamukan listrik ini?” ujar Palui batakun pina musti.

“Wah kalu itu tatakunannya aku kada tahu, tapi nang jelas bahwa listrik ini kada biasa hilang. Kalu biasa jua hilang maka aku kada tahu siapa nang mancuntan dan nang manamuakannya pulang,” ujar patugas PLN itu kada paham maksud tatakunan Palui. (ivd/mht)

Sumber: Banjarmasin Post Edisi Cetak, tanggal 11 Juli 2019

Warga kampung Palui bergembira saat listrik akhirnya masuk ke desa mereka. Semua antusias membicarakan hal itu, termasuk Palui, Garbus, dan Tulamak. Palui bahkan menawarkan rumahnya sebagai contoh pertama pemasangan listrik.…