Kesah Palui : Minta Kirimi Gambar

Kesah Palui : Minta Kirimi Gambar

Palui yang sudah tiga tahun di Jawa berencana pulang kampung saat liburan untuk mengurus warisan. Mamarinanya melarang karena tiket kapal dan pesawat sulit didapat, tapi Palui bersikeras. Ia menulis surat kepada kakaknya, meminta “gambar” hasil penjualan tanah, maksudnya uang. Namun kakaknya justru mengirim foto keluarga dan gambar kebun. Palui lalu memperjelas maksudnya, menyebut “gambar” berwarna merah dengan dua orang berkupiah — uang lima ribuan. Kakaknya membalas, menolak mengirim karena bagian warisan Palui sudah habis. Palui pun kecewa, menyadari pulang tak ada gunanya selain menambah penyesalan.

*****

Sudah talu tahun ini Palui umpat mamarinanya sakulah di Jawa. Makanya wayah liburan sakulah tadi inya baniat handak bulik karna sudah dandaman banar wan kaluarganya.

“Kada usah bulik Lui ai, karna kada nyaman bulik wayah-wayah liburan kaya ini,” ujar mamarinanya manangati.

“Ulun bulik kada cuma dandaman wan kampung tapi handak maurus warisan,” ujar Palui baulah alasan.

“Warisan nang mana Lui, kudangar sudah dijual dangsanak ikam,” ujar mamarinanya.

“Kalu tanah pahumaannya sudah dijual, maka kabalujuran aku handak ma-ambil duitnya,” balas Palui.

“Bulik wayah liburan ini ngalih banar Lui ai karcis pasawat atawa karcis kapal sudah habis tajual saminggu atawa sapuluh hari sabalumnya,” ujar mamarinanya.

Sabulan labih sabalum handak bulik, Palui sudah bakirim surat wan kakaknya minta kirimi duit. Karna inya supan, hidup di Jawa dipadahakan kada baduit maka dalam surat itu Palui manulis halus banar bahasanya.

“Tahun ini ulun handak bulik, tulung kirimi babarapa buting gambar,” ujar isi surat Palui.

KADA lawas datang surat balasan matan kakaknya, di samping bahabar salamatan ada babarapa lambar gambar, yaitu gambar kayi wan nininya, gambar rumah dan gambar sakaluargaan. Karna lain gambar itu nang dimaksud Palui, maka inya mambalasi pulang.

“Gambar kiriman sudah ditarima, tapi lain gambar itu nang dimaksud. Gambar-gambar kayi nini itu sudah baisian. Tulung kirimi gambar lainnya, umpamanya gambar pahumaan nang dijual,” ujar isi surat balasan Palui.

Lalu kakaknya mambalas mangirimi gambar pahumaan wan gambar kabun nyiur.

“Wah… kada pamahaman banar kakak tuha ini, dasar pambabal. Makanya Palui bakirim surat pulang. Ditulisnya : tulung kirimi gambar hasil bajual pahumaan wan kabun nyiur. Gambar itu kartasnya tipis haja dan balangnya habang, di bagian mukanya ada gambar dua urang bakupiah. Kalu kada salah di atasnya ada lima bigi gambar hintalu batatai tungkatnya,” ujar isi surat Palui.

“Palui, Palui, ikam dasar mulai bahari ma-akal tarus bila handak minta kirimi duit, kanapa maka kada bapadah tarus tarang haja. Sabujurnya aku paham haja maksud surat tikam itu, tapi kami kada kawa mambari lagi karna bagian ikam sudah habis diambil wayah ikam tulak ka jawa tadi,” ujar bunyi surat balasan kakaknya.

Palui taungut imbah mambaca surat balasan kakaknya itu, lalu inya bapadah wan mamarinanya.

“Bujur ujar sampiyan jua julak ai bahwa bulik wayah liburan ini kada nya­man,” ujarnya manutupi kakaciwaannya. (mht/rep)

Sumber: Banjarmasin Post Edisi Cetak, tanggal 12 Juli 2019

 

Palui yang sudah tiga tahun di Jawa berencana pulang kampung saat liburan untuk mengurus warisan. Mamarinanya melarang karena tiket kapal dan pesawat sulit didapat, tapi Palui bersikeras. Ia menulis surat…

Tinggalkan Balasan

Alamat email Anda tidak akan dipublikasikan. Ruas yang wajib ditandai *