Kesah Palui: Naik Tarus

“Ui abahnya, adakah baisi duit nah, duit balanjaanku karik sudah abahnya ai,” ujar bini Palui manakuni lakinya.

“Umai satumatnya habis duit umanya?” ujar Palui pina hiran lawan bininya.

“Pian ni bah ai kada tahu wayah ini, mambawa duit lima puluh ribu ka pasar, barangnya kada tapi kalihatan. Haraga bilang naik tarus,” ujar nang bini mamadahi.

“Namun kaya itu, bahimat ai umanya, jangan talalu obral lawan duit,” ujar Palui sambil manjulung duit haraga ratusan.

“Itu nah kujulung duit saratus ribu, bisa-bisa ikam maaturnya,” ujar Palui.

“Minta tulung ai pian tukarakan hintalu lawan uyah di warung acil Irus sana, ulun haur bamasak nah,” ujar nang bini manyuruh Palui.

“Limbah maminta duit, manyuruh pulang umanya ini,” ujar Palui manggarunum.

Sampai di warung acil Irus sakalinya tatamu lawan Garbus wan Tulamak minuman teh.

“Laki nang baik jua kawal kita ni Mak lah? hakunan disuruh bini baulanja,” ujar Garbus mahuluhut.

“Wajar haja Bus ai, Palui takutan lawan bininya kalau kada dibari malamnya, ha..ha…..” ujar Tulamak wan Garbus tatawaan.

“Napa ditukar Lui?” ujar acil Irus batakun.

“Nukar hintalu sapuluh lawan uyah sabungkus. Barapa cil?”

“Barataan dua puluh lima ribu lui ai, harga naik pulang,” ujar acil Irus.

“Iya am kaya ini, barang naik tarus, makanya biniku bahamuk-hamuk di rumah haur kakurangan duit,” ujar Tulamak manimpali.

“Urang padahi Mak ai. Amun barang naik tu jangan manyalahakan laki, sariki bubuhan

buruh tu,” sahut Palui.

“Napa hubungannya Lui lawan buruh? Naik barang ni gara-gara pamarintah manaikakan BBM, jadi haraga nang lain umpatan jua naik,” ujar acil Irus kada paham.

“Satahuku kaya itu jua, Napa hubungan buruh wan kanaikan wan panurunan barang? Ikam ni maranyau Lui ai,” ujar Garbus.

“Bubuhan ikam ni dasar kada pamahaman, tamasuk pian acil Irus ai. Lawasnya bajualan kada tahu siapa nang katuju manaikakan wan manurunkan barang. Coba ikam itihi siapa nang manaikakan barang ka motor wan nang manurunkan barang di pasar Antasari sana! Bubuhan buruh kalu?” ujar Palui langsung mangalunyur bulik.

“Dikalahi inya pulang kita Mak ai,” ujar Garbus mamadahi Tulamak.

Sampai dirumah Palui dimamai bininya pulang kalawasan babilanja… (bpost/fai)

Kesah ini ulun ambil dari koran Banjarmasin Post edisi Selasa, 6 Mei 2025.

“Ui abahnya, adakah baisi duit nah, duit balanjaanku karik sudah abahnya ai,” ujar bini Palui manakuni lakinya. “Umai satumatnya habis duit umanya?” ujar Palui pina hiran lawan bininya. “Pian ni…