Kesah Palui: Tatinggal Saraka’at

PALUI di kalangan kakawalannya digalari santri hanyar karna sabalumnya inya tamasuk bambung kaya nang lainnya jua. Tapi barakat bimbingan mamarina wan pengalaman hidupnya nang tabanyak sakitnya daripada sanangnya maka inya batubat banar, bausaha maubah kabiasaan jahilnya.

“Kami Lui ai basyukur karna ikam wayah ini pina alim banar imbah datang matan kuta,” ujar Garbus.

“Aku kada tahan uji Bus ai, sakalinya hidup di kuta itu harus bahaharatan, harus wani basaing apalagi nang manyangkut duit dan harta gasan hidup,” sahut Palui.

“Makanya sudah kupadahkan bahwa harta itu adalah gala-gala iman, bila kada kuat bisa tacabur ka jalan nang salah kaya manipu, mancopet, bajual diri wan bahianat nang bisa manimbulkan parkalahian,” ujar Garbus. “Makanya kami syukur imbah balik ka banua hakun balajar manjadi dan mandarasi kajian sambahyang.”

“Tapi… dasar utak sudah tuha, tagah jua hafalannya, bahanu tasalah, rancak jua kada ingat dan tapuntal-puntal bacaannya,” ujar Palui pina sadih.

Wayah sambahyang jumahat, Palui kada kawa basungsung ka masigit, anaknya cariwit banar karna gagaringan. Karna itu inya datang pandudian banar sampai kada mandangar khutbah, bahkan wayah inya sampai ka langgar urang sudah masuk rakaat kadua, tapi inya tatap umpat bajamaah. Imbah para jemaah salam, Palui umpat jua salam.

“Uuii Lui, kanapa maka ikam umpat jua salam manuruti kami?” ujar Garbus managur.

“Pukuknya aku umpat ba-imaman kaya ikam jua,” sahut Palui.

“Ikam tadi kami lihat tadudi datang, tatinggal saraka’at umpat sambahyang jumahat,” ujar Tulamak. “Mustinya bila ikam tatinggal saraka’at maka imbah Imam salam maka ikam badiri pulang manambah raka’at kakurangannya.”

“Tapi tadi niatku sambahyang Jumahat ini dua raka’at jua,” sahut Palui manjawab.

“Bujur haja niat usalinya dua raka’at, tapi nyatanya ikam cuma manggawi saraka’at haja. Maka itu sambahyang ikam kada sah,” ujar Garbus.

“Sah atawa kada, ditarima Tuhan atawa kada, itu tasarah Tuhan,” sahut Palui. “Karna sasuai wan niat sabalum maangkat takbir tadi: Sangaja aku sambahyang jumahat saraka’at, tarima kada tarima nang panting aku sudah sambahyang,” ujarnya kasukaan.

“Wah ngalih jua talawani pareman insyaf,” ujar bubuhannya kakalahan. (ivd/mht)

—-
Kesah ini babuhan ulun ambil dari koran Banjarmasin Post edisi Rabu tanggal 7 Mei 2025.

PALUI di kalangan kakawalannya digalari santri hanyar karna sabalumnya inya tamasuk bambung kaya nang lainnya jua. Tapi barakat bimbingan mamarina wan pengalaman hidupnya nang tabanyak sakitnya daripada sanangnya maka inya…