Kesah Palui: Umpat Batakun

PALUI siang itu handak ka pahumaan manuntungakan gawian. Di rumah kadada siapa-siapa lagi kacuali anaknya nang panyulungnya.

Bininya tulak ka arisan mambawa anaknya nang pahalusnya. Tapaksa inya bapasan wan anaknya supaya manjagai rumah wan jamuran.

“Aku bapasan wan ikam nak ai, kaina bila ada urang mancari aku handak baurusan atawa ada kaparluan lain maka lakas-lakas lah kiau aku di pahumaan,” ujar Palui bapasan. Imbah bapasan Palui langsung ma-ambil tupi wan tajak lalu langsung tulak ka pahumaan nang jauhnya kurang lebih satangah pal matan rumahnya.

Paharatan anak Palui manunggui jamuran kada lawas datang manggagulur sapida mutur bamandak di halaman rumah Palui. Urang itu langsung batakun, “Bujurkah ini rumah Palui?”

“Inggih ini rumah abah ulun,” sahut anak Palui. “Kalau sampiyan handak batamu sidin maka hadangi satumut ulun kiyau-akan karna tadi sidin bapasan bila ada nang mancari-i supaya sidin diambili,” ujar anak Palui.

“Ada nang handak kutakunakan,” ujar tamu itu.

“Sambil mahadangi abah ulun, silakan sampiyan masuk ka rumah,” ujar anak Palui sambil manyadiakan nginuman wan wadainya.

Anak Palui langsung bukah ka pahumaan mandapati abahnya lalu sambil hingak-hingak kauyuhan baucap: “Bah…..abah, di rumah ada tamu mancari-i sampiyan, pinanya panting banar,” ujar anak Palui.

“Kaya apa urangnya Kil?”

“Urangnya gagah, basapida mutur wan badasi,” ujar Tukil.

“Pasti panting banar urusannya, mungkin urang bank handak mainjami kridit parmintaanku,” ujar Palui. Lalu inya langsung bagagas bulik karna bakal barazaki ganal.
Sampai di rumah, Palui langsung ka sumur babasuh batis, batampungas supaya kalihatan barasih lalu masuk karumah baganti baju nang hanyar.

“Sampiyan datang matan mana?” ujar Palui batakun.

“Ulun matan kuta ada nang handak dipanderakan,” ujarnya.

“Urusan bank itukah?” ujar Palui handak banar tahu. “Kalau sual jaminannya kutanggung karna pahumaan kami parak mangatam,” ujar Palui.

“Lain urusan bank atawa urusan jaminan,” ujar urang itu.

“Lalu urusan napa?”

“Urusan ulun sabujurnya kada panting banar tapi hanya handak batakun,” ujar tamu itu.

“Batakun napa?” sahut Palui.

“Ulun handak batakun di mana rumahnya Pak Haji Duraup?”

“Ooooo…… rumah Pak Haji Duraup kah? Itu di subahlah sana parak langgar,” sahut Palui pina kaciwa.

“Ulun parmisi dan tarima kasih,” ujar tamu itu lalu tulak.

“Talalu-lalu banar tamu itu, hanya handak batakun rumah wak haji haja mangalihkan aku maninggalkan gawian di pahumaan,” ujar Palui gagarunum sarik wan anaknya.

“Salah sampiyan jua bah ai, karna tadi sampiyan bapasan minta kiyauakan bila ada urang nang mancari,” ujar anaknya kada hakun disalahakan. (mht/rep)

———–

Kesah ini ulun ambil dari koran Banjarmasin Post edisi Jumat 9 Mei 2025 di halaman 1 dan 5.

PALUI siang itu handak ka pahumaan manuntungakan gawian. Di rumah kadada siapa-siapa lagi kacuali anaknya nang panyulungnya. Bininya tulak ka arisan mambawa anaknya nang pahalusnya. Tapaksa inya bapasan wan anaknya…